Kofod: USA-mit aningaasaliissutit suli oqaluuserineqarput

Amerikami illersornissaqarfiup Kalaallit Nunaanni aningaasaliissuteqarnissamik kissaateqarnini 2018-imi oqaatigisimavaa, amerikamiullu oqaloqatigineqarnerat suli ingerlavoq, nunanut allanut ministeri ilisimatitsivoq.

Amerikami illersornissamut ministeeriaqarfiup, Kalaallit Nunaanni attaveqaatinut aningaasaliissuteqarnissamik siunnerfeqarneq, 2018-imi septemberip qaammataani tamanut saqqummiuppaa. Aningaasaliissuteqarnermi sakkutut inuinnaallu iluaquserneqarnissaat siunertarineqarpoq.

Folketingimi ilaasortap Aaja Chemnitz Larsenip (IA), nunanut allanut ministeri Jeppe Kofod (soc) piumaffigisimavaa, amerikamiut nalunaarutaat pillugu oqaloqatigiinnerup killiffiaik nalunaaruteqaqqullugu.

Kofod akissuteqarluni allappoq, 2018-imi septemberip 16-iani nalunaaruteqartoqarmalli, suliaq pillugu Amerikami, Danmarkimi Kalaallillu Nunaanni oqartussat attaveqatigiittuartarsimasut.

Kofod ilisimatitsivoq, Danmarkimi naalakkersuisut USA-mik oqaloqateqartut:

- Naalakkersuisut qanimut tigussaasumillu suleqatigilluarlugit - aamma Kalaallit Nunaanni innuttaasunut kiisalu Kunngeqarfiup Danmarkip nunanut allanut, illersornissamut isumannaallisaanissamullu politikkikkut soqutigisaasa inuinnarnut iluaqutaanissaat eqqarsaatigineqarput, Aaja Chemnitz Larsenimut akissummi allassimavoq.

Inuinnaat sakkutuullu pisariaqartitaat pillugit paasissutissarsisimasoq

Jeppe Kofodip aamma ilisimatitsissutigaa, Amerikami oqartussat Kalaallit Nunaannut tikeraartarsimasut, amerikamiullu Kunngeqarfimmi Danmarkimi inuinnaat sakkutuullu pisariaqartitaat pillugit paasissutissarsisarsimasut.

KNR-ip decemberip qaammataani oqaluttuarimmagu, Amerikami atorfilittat Qaqortumi, Nuummi Ilulissanilu timmisartoqarfiliassat ilaatigut misissuiffiginiarlugit aasap ingerlanerani Kalaallit Nuaanniissimasut tupaallaatigineqarpoq. Amerikamiullu taakku ilaannut aningaasaliissuteaqarnissamik eqqarsaasersorsimapput.

Powered by Labrador CMS