Kofod: Nutaanik aallartitaqarfeqalernerit ajunngivipput
Nunanut allanut ministerip Jeppe Kofodip Kalaallit Nunaata aallartitaqarfeqarnerminik nunarsuarmi annertusaanera pissusissamisoorsoraa, tamanna Siumut anguniagaasa ilagivaat.
Siumut nunanut allanut tunngasutigut oqaaseqartartuata Karl-Kristian Krusep nunanut allanut tunngasutigut naalakkersuinikkut ingerlatsineq pillugu nassuiaat oktobarip 21-ani sammineqarmat, partiip Kalaallit Nunaata Kinami aallartitaqarfissaanik pilersitsiniarluni aamma “Washingtonimi aallartitaqarfup New Yorkimiittussamik aappernissaanik” sulissuteqarluni suliaqarnini suli ingerlakkai.
Berlingskemi Jeppe Kofod aperineqarsimavoq, Siumut pilersaarutaanut qanoq isumaqarnersoq:
Niueqatigiinnerulerneq
- Tapersersussavarput, assersuutigalugu Kalaallit Nunaat nunarsuarmi niueqateqarnera pitsaanerulersissinnaammagu aamma Kalaallit Nunaat nunat tamat akornannut inississinnaammagu. Danmarkimit Naalagaaffeqatigiinni ineriartortoqarnera tapersersussallugu pingaarnertut suliassaraarput, aamma nunanut allanut tunngasutigut ingerlatsinermi, Jeppe Kofod Berlingskemut oqarpoq.
Ministerip takusinnaanngilaa, USA-p Kalaallit Nunaannut iluareqqusaarsimanerata ajortumik kinguneqarsinnaanera.
- Amerikamiut Kalaallit Nunaannik suleqateqarnerorusunnerat ataatsimut isigalugu pitsaasuuvoq, aamma periarfissarpassuarnik pilersitsisinnaavoq. Tamanna ajornartorsiutiginngilarput aamma apeqqutit taakkorpiaat pillugit Namminersorlutik Oqartussat suleqatigilluarpavut, Jeppe Kofod aviisimut oqarpoq.
Maannali naalakkersuisoqatigiinnissamik isumaqatigiissut 2020-mullu aningaasanut inatsisissaq pineqartillugit Kinami New Yorkimilu aallartitaqarfissanik nutaanik pilersitsiniarneq pillugit apeqqutit oqaluuserisassanut ilaatinneqanngillat. Sermitsiaq.AG-llu ilisimatinneqarsimanera naapertorlugu, Nunanut Allanut Naalakkersuisoqarfimmi suliamik tamatumannga nukingiussiniarluni sulissuteqartoqarniarpasinngilaq.