nersornaasiineq

Koda Greenland Awards 2015 tunniunneqartut nalinginnaasumik amerlanerusut

Inuit festerpalaarlutillu nuannapput Koda-p nunatsinni nersornaasiuttakkani tunniummagit, tassani kalaallit taalliortut erinniortullu aammalu nipilersortartut arfininngormat januaarip 31-anni Nuummi kulturip illorsuani Katuami nersorniarneqarmata

Qatanngutigiit Nanook-unneersut Frederik K. Elsner (saamerleq) aamma Christian K. Elsner (talerperleq) Koda Greenland Awards-inik nersornaasiinermi ´Ukiumi Nersornaat 2014´-imik tunineqarput. Nersornaatisissutigaat saqqummersitartik ´Pissaaneqaqisut´

Ukiut marluk qaangiupput Koda Greenland Awards kingullermik ingerlanneqarmat, taamaattumillu 2013-imut 2014-imullu nersornaatit tunniunneqarput.

Nersornaasiinerit kingorna Koda Greenland Awards komite-p siulittaasua Juaaka Lyberth Sermitsiaq.AG-p attaveqarfigaa. Arfininngormat unnukkut Katuami nersornaasiineq imatut oqaluttuaraa:

Inunnit nuannarineqarluartoq erinarsortartoq aliikkusersuisartorlu Iluliaermiu Maalia Mathiassen akunniliisartoralugu nersornaasiineq nuannersumik, pikkunartumik aliikkusersornartumillu ingerlanneqarpoq, pikkusuttunik nuannaartunillu isiginnaartoqarluni. Unnummi sammineqartorujussuaq tassaasimavoq nersornaatit sisamat kikkut pissaneraat:
Ukiumi Nersornaat 2014
Ukiumi Nersornaat 2013
Isumalluarnartumut Nersornaat 2013-14
Ataqqinaammik Nersornaat 2013-14

Unnuk aallarnerlugu qilanaartuuserlutik nipilersorput Maalia aamma Jonas Fleischer (Ilulissaneersut). Taakku ilaatigut ´kalak-jazz´-ertarnerminnik ilisimaneqarput. Tulliuppoq Kalaallit Nunaanni nipilersornermi hip hop rap-imi nutaamik tusaamasanngortoq Nikolaj Lønstrup, Qaqortumeersoq.

Nersornaatit sisamat tunniunneqarput

Tamatuma kingorna pissangagineqartut tullinnguupput - isiginnaartut utaqqisinnaajunnaarpaat Koda Awards-inik piumaneqartunik, tamarmik 30.000 koruuninik aningaasartalinnik, tunineqassanersut.

Nutaatut aaqqissuussisut immikkoortuni tamani innersuussutigineqartut tamaasa video-liakkut ilisaritippaat, skærmerujussuarmi takutinneqartunik.
Koda Greenland Awards 2015-imi nersornaatit imatut agguaanneqarput:
Ukiumi Nersornaat 2013, ukioq taanna saqqummersitamut pitsaanerpaamut, Katsi Kleist.
Ukiumi Nersornaat 2014, ukiumi tassani saqqummersitamut pitsaanerpaamut, tunniunneqarpoq qatanngutigiinnut Frederik K. Elsnerimut aamma Christian K. Elsnerimut, nipilersoqatigiinnit Nanook-unneersunut.
Isumalluarnartumut Nersornaat, Uyarakq-imut, Aqqalu Engell.
Ataqqinaammik Nersornaat 2013-14 tunniunneqarpoq rap-ernermik hip-hop-imillu nipilersortartutoqqanut Nuuk Posse.

Powered by Labrador CMS