Købmandshandel kiisami sinneqartooruteqarsimasoq
Nuuk Købmandshandelip ukiumoortumik naatsorsuutaani takuneqarsinnaavoq, ukiut tallimat ingerlaneranni siullermeerluni 2019/20-mi sinneqartooruteqarsimasoq.
Nuuk Købmandshandel ukiumi naatsorsuusiorfimmit 2019/20-mi 1,5 millioner koruuninik sinneqartooruteqarsimavoq, namminerlu aningaasaatai maanna 4,4 millioner koruuniullutik. Kaaviiaartitai 4,5 millioner koruuninik annikilleriarsimapput, 28.3 millioner koruuninillu kaaviaartitarsimalluni.
Aqutsisunit ilisimatitsissutigineqarpoq, coronamut atatillugu killilersuisimanerit ukiumi ilungersunartorsiortitsisimasut, tamatumami malitsigisaanik niuerfertarfimminnik arlalinnik piffissat ilaanni matusisariaqarlutilluunniit killiliisariaqartarsimagamik. Suliffeqarfik Namminersorlutik Oqartussat ikiorsiissutissatut aaqqissuussaannit ikiorserneqarsimanngitsoq ilisimatitsissutigineqarpoq.
Sulifffeqarfik avinneqarsimasoq
Suliffeqarfik martsip qaammataani avinneqarsimavoq, maannalu inissiaatileqatigiiffittut ingerlatseqatigiiffittullu atuutilersimalluni. Tamatumunnga nassuiaatigineqarpoq, ammanersumik ingerlatsisoqarnissaanik kissaateqartoqarsimaneq, taamaalilluni suleqatigisartakkat suliffeqarfimmik malinnaanerulernissamut periarfissaqarnerulersinneqarlutillu ingerlatsineq ukkatarineqarnerulersinnaanngorpoq.
Akiligassaqarfigineqarnerpaasup akiliinissamik kinguartitsigallarnissaq akuersaarsimavaa, ”tamatuma takutippaa, pilersuisunut akiitsut ilarpassuinik akiliinissamut kinguartitsinikkut ingerlatseqatigiifik tapersersorneqartoq”, aqutsisut nalunaarumminni allapput.
Nuuk Købmandshandel it-mut atatillugu ajornartorsiuteqarsimavoq, tassa ERP-mik atortorissaarut ajoquteqarsimammat, ajoqutaasalu aaqqissuunneqarnerat suli aningaasartuutaallutik.
Kukkunersiunermi nangaanartut
Kukkunersiuisarfiup BDO-p naatsorsuutit nangaanartoqartippai.
- Ukiumi naatsorsuuteqarfiusumi 2018/19-imi ingerlatseqatigiiffiup uninngasuutiminik aqutsinermini ajornartorsiuteqarsimanerata malitsigisaanik, ullormi killiffissiuinerup kingorna uninngasuutinik misissuisoqarsimanngilaq, BDO allappoq, nangillunilu:
- Ukiup naatsorsuuteqarfiusup 1. oktober 2019-imi aallartinnerani ingerlatseqatigiiffiup uninngasuutai pillugit naammattumik naleqquttumillu kukkunersiuisinnaasimanngilagut. Uninngasuutit ukiup allartinnerani nioqqutissanik atuinerup naatsorsorneqarsimanerannut ilanngunneqarsimammata, siorna angusarineqarsimasut pisariaqartinneqartumik iluarsineqarsimasinnaanersut, taamalu ukioq manna angusanut sunniuteqarsimasinnaanersut aalajangersimasumik oqaatigisinnaasimannginnatsigu.
Siulersuisut nutaat
Aqutsisut ukiumi pitsaanerusumik angusaqarsimaneq pillugu imatut allapput:
- Angusat pitsaanerulersimanerannut pissutaavoq, ingerlatseqatigiiffiup ullormi 30/9 2020-mi uninngasuutinik kisitsisarnermik akigititassanillu aalajangersaasarnermik pitsanngorsaasimanera, naatsorsuutigisatullu tamanna uningaasuutit nalingannut pisaasumik sunniuteqarsimalluni.
Erik Brogaard pisortaavoq, ingerlatseqatigiiffimmilu siulersuisut februaarip qaammataani allanngortinneqarsimapput, tassani Niels Karstensen Britta Keldsenilu ilaasortanngorsimallutik, kingullertut taaneqartoq Bent Bertelsen siulersuisuni ilaasortanngortoq taarserlugu siulittaasunngorsimalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...