Københavnimi pisortassaq nassaarineqartoq

Jens Heinrich 48-nik ukioqartoq ukiup affaani kingullermi Sinniisoqarfimmi immikkut siunnersortitut sulisimavoq. Naalakkersuisut tusagassiorfinnut nalunaaruteqarlutik allapput.

- Nuannaarutigaara suliassaqarfimmi pikkorilluinnartumik Namminersorlutillu Oqartussanut ilisimasaqartumik misilittagaqarluartumillu atorfinitsitsisinnaagatta. Piffissami aggersumi Jensip suleqatiginissaanut qilanaarpugut, Naalakkersuisut Siulittaasuat Nunanullu Allanut Naalakkersuisoq Múte Bourup Egede oqarpoq.

Jens Heinrich Issittormiut kultureqarnerat, oqaasii inuiaqatigiittullu pissusii pillugit Ilisimatusarfimmi ph.d.-gradeqarpoq, 2004-milu Inuiaat Kulturiannut Oqaluttuarisaanerannullu Immikkoortortami cand.mag.-inngorsimalluni. Sinniisoqarfimmilu pisortanngorlaap pissutsit oqaaseqarfigisarpai.

IA-mi siunnersortaasimasoq

Jens Heinrichip ilaatigut ukiualuit matuma siornatigut, tusagassiortup Imperiets Børn-imik atuakkiorsimasup atuakkiamini pinngitsaalineqarsimasutut, innarlerneqarsimasutut qallunaanngorsarneqarsimasutullu misigisimasunik ujaasineranut atatillugu, Kalaallit Nunaata nunasiaanermiit danskit amtiannut ikaarsaariarnera pillugu oqallittoqarmat oqaaseqarfigivai.

Heinrich taamanikkut Folketingimi IA-mut siunnersortaavoq, Saammaasseqatigiinnissamullu ataatsimiisitaliami ilaasortaasimalluni.

Oqallittoqarnerani oqaaseqarnermini erseqqissaassutigaa, ullut allanngulerfiit qernertuinnartut qaqortuinnartullu taaneqarsinnaanngitsut – qallunaat ajortuliortuusut kalaallillu eqqugaasuullutik.

Qitiusumik aalajangiiniarnerni sapinngisamik isumaqatigiilluni aalajangiiniartoqartarsimasoq, taamanikkut oqaatigivaa.

- Assersuutigalugu eqiterinissamik politikki (innnuttaasut nunaqarfinniit illoqarfinnut noorartillugit, aaqqiss.) qallunaat kisimik politikkerisimanngilaat. Tamanna aamma kalaallinit taamatut anguniagaasimatigaaq. Landsrådip isumaqatigisimavaa Kalaallit Nunaata ineriartortinnissaanut nunassittarnerup allanngortinnissaa pisariaqartoq, Jens Heinrich tikkuaavoq.

Jens Heinrich ulloq 1. januar 2022 pisortatigoortumik sulilissaaq.