Københavnimi inuusuttut sumiginnakkat: Sinnattut kasseeqqamut poorneqaraangata

Kalaallit inuusuttut 50-it missaanniitttut Københavnimi annertunerusumik annikinnerusumilluunniit angerlarsimaffeqanngitsutut inuupput. Imigassamik aanngajaarniutinillu annertuumik atornerluinermik atuiffiusoq inuuneraat.

- Amerlanersaat ajornartorsiuteqaratik isumaqarput. Tamanna aatsaat ukiup aappaa avillugu imaluunniit ukiut marluk ingerlareernerini paasisarpaat. Arnaanerusarput sakkortuumik inuuneqarnerminnik oqaluttuartut, Jeanette Madsen Natcafé-mi Sundholmimi inuusuttut arlallit najugaqarfianni isumaginninnermik suliaqartartuusoq oqarpoq.

Kalaallit Illuat Københavnimiittoq inuusuttut 50-it missaanni misissuinermik ingerlataqarsimavoq. Misissuinerup takutippaa, Danmarkimi utoqqaat sumiginnakkanit taakku ajornerusumik inissisimasut.

- Taakkua inersimasut angajoqqaamik peqaavi sumiginnakkatut isigaat. Taakkuali imminnut sumiginnakkatut isiginngillat.
Taakku festertutut imminut isigipput aaqqikkumaarlutillu imminut nalilerlutik, Mille Schiermacher misissuinermi pingaarutilittut inissisimasoq oqaluttuarpoq.

Inuuneq pissaganartoq

Misissuinerup aamma takutippaa, taakkua Danmarkimut nuunnerminni pitsaanerusumik inuuneqarnissamik sinnattoqartarsimasut.
Kalaallit Nunaanniillu pissutsinik qimarratiginnittuusinnaallutik.

- Taakkua ilaasa Danmarkimut nuunnertik pissaganartumik amerlanerusunillu periarfissaqartumi inuuneqalernissaq tunngavilersuutigisimavaat. Ilaat Kalaallit Nunaanni aappariinnerliorneq pissutigalugu nuussimapput. Ataasiakkaallu ilaqutariinnerup iluani misigisimasaminnit qimarratiginnittuullutik. Ilagaallu ilinniagaqarniarlutik nuussimasut, Jannie Getreuer Michaelsen Christianiami angerlarsimaffeqanngitsunut sullissisuninngaanneersoq oqarpoq.

Amerlanersaannilu ilinniagaqarnissamik sinnattoqarneq pissutaasartoq, misissuinerup takutippaa. Amerlasuutigulli sinnattup qanoq piviusunngortinnissaa pilersaarusiorsimaneq ajorpaat.

- Isumaqarpunga pilersaarutit ersarluttut, Jannie Getreuer Michaelsen oqarpoq.

Sinnattoq piviusunngortikkuminaatsoq

Amerlasuut qallunaatut pikkorliortuupput, tamannalu ilinniagaqarnissamut aporfigineqartarpoq. Allanilli aamma ajornartorsiuteqarpoq.

- Uagut angerlarsimaffeqanngitsunik sullissisut naapittakkagut ilinniagaqarnissamik periarfissakitsuaraapput. Amerlasuut inissaqanngillat, kisianni kammalaatiminni, nalunngisaminni imaluunniit ilaquttaminni najugaqarput. Ilinniagaqalerniarlunilu sumut saaffiginninnissamik aamma ilisimasakittoqartarpoq. Ilinniagaqalersinnaanngitsut arlallit suliffimmik pissarsisinnaanngingajapput. Pappilissat uppernarsaatit suliffissarsiuussisarfimmiillu piumasaqaatit amerlasuunit naammassineqarsinnaanngillat, Jannie Getreuer Michaelsen oqarpoq.

Inissaaleqineq ulluinnarni Sundholmimi imaluunniit Christianiami atornerluitarnermut attuumassuteqartarpoq.

- Isumaqarpunga naapittakkagut anguniakkaminniit ungasilluinnartartut, Jannie Getreuer Michaelsen naliliivoq.

Ikiortissarsiorneq ajortut

Inuusuttulli suli ajornartorsiuteqaratik isumaqartaramik isumaginnittoqarfimmi sullissisunut saaffiginninneq ajorput.

- Eqimattani inuusuttunik pissarsiariuminaatsoqarpoq. Taakku nammineerniartarput kalaallinit utoqqaanerulaartunit isumaginnittoqarfimmi sullissisunut saaffiginnittarnerattut saaffiginninneq ajorput, Jannie Getreuer Michaelsen oqarpoq.

- Ilaatigut oqaatsit aporfiusarnerat pissutigalugu eqimattaq taanna pissarsiariuminaattarpoq. Ajornartorsiutip aappaa tassaavoq, tamaaniitillutik annertuumik sunnertisimasarnerat taamaatsillugimmi oqaloqatigiuminaassinnaasarput. Aammami attaveqarusunneq ajorput, Jeanette Madsen Sundholmiminngaanneersoq ilassuteqarpoq.

Ineqarneq aningaasallu

Taakkuli ikiortissarsiuleraangamik amerlanertigut ajornartorsiutaat annertusereertarput. Jannie Getreuer Michaelsenip oqaluttuaraa, kalaallit utoqqasaajunerit Chistianiamiittut inuusuttut ernumassutigalugit saaffiginnittartut. Taamaasinerani ilinniagaqarnissamik sinnattoqarneq soqutaajunnaareersimasarpoq.

- Attaveqarfigingaangatsigit inissamik aningaasanilluunniit ikioqqunerusarput.

- Taamatulli ikiorsiisimatilluta amerlanersuut ingerlariaqqinneq ajorput. Angerlarsimaffeqanngitsut ornittagaannut inissiisimatilluta inissamik ikiorsiinissarput maleruaqqusanit ingerlatseriaatsimillu aporfilersorneqartarpoq.

Christianiami aamma Sundholmimi misilittakkat Kalaallit Illuata misissuineranit taperserneqarput.

- Imminut takusinnaannginneq ikiorsiinissap ajornakusoornerannut pissutsit ilagisarpaat. Ataavartumik aaqqissutissat soqutigineq ajorpaat, aningaasallu maannakkorpiaq pissarsiarisinnaasatik soqutiginerusarlugit. Pissarsingaangamillu tammartarput taamaammat atassuteqarniarneq ajornakusoortarpoq, Mille Schiermacher oqarpoq.

Misissuinerup takutippaa, inuusuttut sinnattutik suli attatiinnaraat. Piviusorli tassaavoq, inuusuttut taakkua atornerluinermik inuuneqarneq sungiutereersimammassuk.

- Taakku Københavnimi inuuniarnerup naatsorsuutigisamik sakkortunerusarnera pissutigalugu neriuutigisimasaat sinnattuisalu ilaat poortorneqartarput puiorneqarlutillu, Jeanette Madsen Sundholmiminngaanneersoq oqarpoq.

Københavnimi inuusuttut sumiginnakkat pillugit allaaserisat tamaasa una toorlugu atuarsinnaavatit.