Københavnimi inuusuttut ilungersuuteqartut: Festi taamaatikkaangat

Kalaallit inuusuttut eqimattat 50-it missaanni Københavnimi angerlarsimaffeqanngitsutut inuuneqarput. Københavnimi inuuneq nuannersumik aallartissimagaluartoq nakkaannermik kinguneqarpoq.

Aallaqqaammut uani Stjerneskibet-imi Københavnimiittumi festerneq pisarpoq.

Jannie Getreuer Michaelsen ulluinnarni Christianiami Københavns Kommunemi angerlarsimaffeqanngitsunut sullissisuuvoq.

Taassuma kalaallit ilungersuuteqartut arlallit Christianiamiittut ilisarisimalluarpai, taakkunanngalu arlallit ukiuni arlalinni ilisarisimasaralugit.

Ukiulli marluk matuma siorna pissutsit allanngoriartulersimapput.

- Maluginiarsimavarput inuusuttut amerlasuut tamaani sulerinissartik ilisimanagu Stjerneskibetimukarsimasut, taanna oqarpoq.

Stjerneskibet tassaavoq kalaallit Christianiami ornittagaat. Qulaani ineqarpoq. Ataani caféqarlunilu imerniartarfeqarpoq. Inuusuttut amerlanersaat tassaniittarput.

- Inuusuttut inuusuttoqatitik Stjerneskibetip ataani issiaqatigisarpaat. Tassani immiaarartuuttarput hashimillu pujotartarlutik.

Festivalerpalaarneq

Eqimattarlu taanna Københavnimi sumiiffimmi allami aamma maluginiarneqartarpoq. Tassa angerlarsimaffeqanngitsut ornittagaanni Sundholmimi Københavnimi inuunerminni ajornartorsiornerpaat ornittargaanni. Tassani aamma Danmarkimiinneq nuannersumik aallartinneqartarpoq.

- Aallaqqaammut festivalertutut misinnarsinnaavoq. Qanganngorpoq eqimattanik festerniaannarlutik tamaaniittuuteqaratta. Allatut ajornaqimmat unnuiffissarsitippagut, festivalimilu tupersuartut ittumik nappaalluta. Allaaneq ajorpoq festi unitsinnaveersaarlugu imminnut pisartut, Patrick Mølholm Sundholmimi angerlarsimaffeqanngitsut ornittagaanni attaveqaataasoq oqarpoq.

Killeqanngitsumillu festerneq kingunipiluuteqapallattarpoq.

- Festerneq sukkasuumik pisarpoq, arlallit aamma oqartut tusarsimavakka imigassamik, hashimik aanngajaarniutinilluunniit atornerluisooqataanngikkaanni ataatsimoornermut peqataasoqarsinnaanngitsoq, Jannie Getreuer Michaelsen Christianimi angerlarsimaffeqanngitsunik sullissisuneersoq oqarpoq.

Nakkaatipallanneq

Københavnimi inuusuttut ilungersuuteqartut misissuiffigineqarneranni Mille Schiermacher Københavnimi Kalaallit Illuaninngaanneersoq pingaartutut inissisimasimavoq. 50-it missaanni qanoq inissisimanerat pillugu apersorneqarsimapput. Inuusuttut aallaqqaammut ajornartorsiutinut ajorluinnartumik inissittussaanertik ilisimaneq ajoraat, misissuinerup takutippaa.

- Taamaaqatit kisiisa ilagisarlugit nakkaatilerneq paasiuminaattarpoq. Taamaammat inuusuttut arlallit takusinnaaneq ajorpaat, allammi tamarmik taama pissuseqartaramik, taanna oqarpoq.

Nakkaannissarli takkuttarpoq – sukkasuumik sakkortuumillu takkuttartoq, Christianiami misilittakkat takutippaat.

- Isumaqarpunga tamaanga tikinnerminniik sukkasuumik nakkaakkiartortartut. Tamanna sumunnarfissaqannginnermik pissuteqarpoq taamaammallu atornerluisooqataalertarlutik, Jannie Getreuer Michaelsen oqarpoq.

Avatangiisit sakkortuut

Sundholmimilu taamatut ineriartortoqarnera aamma takuneqarpoq. Natcafé unnuit ataasiakkaarlugit siniffimmik pissarsiffiusinnaasoq Sundholmip ilagaa. Jeanette Madsen isumaginnittoqarfimmi sulisoq tassaniippoq.

- Ullaakkut nalunaaqutaq tallimaniik ulloq tamaat unnullu ilanngullugu ineeqqami arlaanni uninnissaq tikillugu ernguttoqartarpoq. Iteraannilu nangittoqartarpoq. Avatangiiseq sakkortoqaaq.

- Tamaanga tikinneranniit annertuunik ajornartorsiuteqalernissaat qaammatialuinnarni pisarpoq. Sapinngisarput tamaat inuit cafétsinniinnginnissaat anguniartarparput, ingerlateqqipallanniartarlugillu. Sukkalluinnartumimmi ajortumut, ilaatigut atornerluinermik kinguneqartumik, ineriartortoqarnera takusarparput, taanna oqarpoq.

Københavnimi inuusuttut sumiginnakkat pillugit allaaserisat tamaasa una toorlugu atuarsinnaavatit.

Powered by Labrador CMS