Københavnimi inuusuttut erloqissuteqartut: Nakuuserneq akissarsiutigalugulu atortittarneq
Aanngajaarniutit soorlu kokainit Københavnimi inuusuttunut erloqissuteqartunut nalinginnaaleraluttuinnarput. Malitsigikkajuttarpaalu nakuuserneq akissarsiutigalugulu atortittartuuneq
Patrick Mølholm Sundholmimi angerlarsimaffeqanngitsut ornittagaanni najugaqartunut attaveqaataavoq. Tassani inuit angerlarsimaffeqanngitsut najugaqarallarsinnaasarput.
Ukiut marluk ingerlanerini inuusuttut amerligaluttuinnartut Kalaallit Nunaaninngaanneersut angerlarsimaffeqanngitsut ornittagaannut nuussimapput. Taakkunannga amerlasuut Danmarkimi pitsaanerusumik inuuneqarnissaq neriuutigisarsimavaat.
- Assersuutigalugu arnamik inuusuttumik nalunngisaqarpunga, taanna nakuusertartumik aappaqarnikuusimanini pissutigalugu tamaannarsimavoq.
Taanna pitsaanerusumik neriuuteqarluni tamaannarsimassagaluarpoq, allaanngilarli neriuut taanna qamissimasoq. Taamatut neriuuteqaleqqinnissaq ajornakusoorpoq. Isigalugu nuanninngilaq – 25-mmi inorlugit ukioqaraanni aqqut suli takivoq, Patrick Mølholm oqaluttuarpoq.
Patrick Mølholmip angerlarsimaffeqanngitsut ornittagaanni sakkortuumik nakuusertoqartarnera arlaleriarluni misigisimavaa. Taassuma nakuusertarneq kalaallillu inuusuttut akornanni kokainip atugaaleraluttuinnarneranut attuumassuteqarluinnarnerarpaa.
Hashi eqiasunnartuusoq kokaini qiimmassimaartitsillunilu sakkortuumik pissuseqalersitsisarpoq.
Kokaini
Jeanette Madsen Natcafép eqqaani sulisuusoq assiganik isumaqarpoq.
- Kokaini hashimiik imigassamiillu akisunerungaatsiarnera pissutigalugu aningaasanik amerlanernik pissarsiniartariaqartarput. Tassa aningaasassarsiorniarlutik aniaarnerusarput, taanna oqarpoq.
Arnaq kalaaleq inuusuttoq oqaloqatigeqqammerpara, taanna 18-inik ukioqarlunili tamaaniilersimavoq ullumikkullu 22-nik ukioqarluni. Oqaluttuaraali inuunini sakkortungaarmat pisinnaajunnaalerluni.
Københavnimi Kalaallit Illuata misissuinerata takutippaa, eqimattat inuusuttut 50-it missaanniittut amerlanersaat piffissami sivisuumi pisortanit ikiorserneqaratik inuusut. Tassa aningaasanik pissarsiniarnissaq pisariaqarnerulluni.
Angutit aanngajaarniutinik tuniniaanikkut isertitaqartarput.
- Taakku tamaaneereersunit inuusunnerusarput, taamaalillutillu akunnerminni pissaaneqarnerusarlutik, Patrick Mølholm oqarpoq.
Persuttaasartoqatigiit
Ukiut marluk matuma siorna Danmarkimut nuuttut akornanni eqimattaqarpoq Sundholmimi atornerluisoqarfimmi pissaaneqalerluinnarsimasunik.
- Piffissap ilaani eqimattaqalerpoq inunnik arfineq-pingasut qulillu akornanni inuttaqartumik, taakku ataatsimoorlutik inunnik persuttaasarput.
Aamma kalaallit arnat ikinngutitik akilersillugit atortittartunngortissimavaat inillu attartugaasa ilaat tiguarsimallugit. Taakku arnat inuusuttut sakkortuumik persuttagaasarsimapput, Patrick Mølholm oqarpoq.
- Angutit taakku ilaat nakuusertarsimanertik ukiuni arlalinni pinerluuteqarsimasut inissiisarfianniittussanngorlutik pineqaatissinneqassutigisimavaat.
Akilersilluni atortittarneq
Akilersilluni atortittartuuneq ukiuni arlalinni Danmarkimi kalaallit erloqissuteqartut akornanni atuussimavoq. Arnat sumiiffissaqarniarlutik, imigassamik pissarsiniarlutik imaluunniit hashimik pissarsiniarlutik angummik atoqateqartarput. Patrick Mølholmip Jeanette Madsenillu oqaluttuaraat, maanna inuusuttut amerlanerit tunulequtalerlutik akilersillutik atortittartunngorsimasut.
- Arnat biilinut ikillugit ingerlanneqartut takusarpagut. Arnat ataasiakkaat tunuliaquserluni akilersillutik atortittartuunerannut takussutissaavoq.
Nakuuserneq, akilersillunilu atortittartuuneq arnanut sakkortuumik kingunerlutsitsisarpoq.
- Arnat oqaluttuaraat, sakkortuumik persuttagaasarsimallutik. Piffissap ilaani angutini taakkunani unnueqqikkusukkunnaarmata tamaani arnat inaanniitissimavagut, Jeanette Madsen oqaluttuarpoq.
Natcafé arnanut inimik piffissap ilaani toqqissisimaffigisinnaasaannik neqerooruteqarpoq. Taannali toqqaraangamikku inissisimanerat amerlanertigut neriuutaarutereersimasutut ittarpoq.
- Kalaaleq arnaq inuusuttoq oqaloqatigeqqammerpara, taanna 18-inik ukioqarlunilu tamaaniilersimavoq ullumikkullu 22-nik ukioqarpoq, ukiullu ingerlanerini oqaloqatigisarsimavara. Taassumalu oqaluttuaraa, inuunini sakkortusimangaarmat pisinnaajunnaalerluni. Aanngajaarniutaapput, erngunnerit angutillu. Taanna inunnit sakkortuumik persuttagaasarsimavoq, aqqusinermi sinittarsimavoq angutinilu nakuusertartuni sinittarsimalluni, Jeanette Madsen oqaluttuarpoq.
- Tassa 22-nnarnik ukioqarluni nammatarpassuaqarpoq.
Piffissap ilaani angerlarsimaffeqanngitsut ornittagaat eqqissisimanerulaalersimavoq. Sakkortuumik nakuusertartut eqimattaat ornigutissaarsimapput.
- Tassani eqimattaminngaanneersut arlallit pineqaatissinneqarsimapput, taakkunanngalu iperangaasimasimasut allallu arlallit aqussinnaannginnatsigit tamaani tikilluaqqusaajunnaarnerarlugit oqarfigisariaqarsimavagut.
Københavnimi inuusuttut sumiginnakkat pillugit allaaserisat tamaasa una toorlugu atuarsinnaavatit.