Skip to main content

Knud Kristiansenip ‘kiffaq-konto’ eqqukkusunngilaa

Ineqarnermut naalakkersuisup, Atassummeersup Knud Kristiansenip, inigisamut piffissaq eqqorlugu akiliisoqartalernissaa siunertaralugu ‘kiffaq-konto’ eqqukkusunngilaa

Nittartakkami uani oqaluttuareriikkatsitut Inip attartortui nuna tamakkerlugu 398-it inigisaminnut akiitsoqarnertik pissutigalugu anisinneqarnissaminnut utaqqipput. Kisitsisini pineqarput attartortut 394-it inissiani kommunimit aamma Namminersorlutik Oqartussanit pigineqartuni najugaqartut aammalu attartortut sisamat Illuutip inissiaataanni najugaqartut. 

Nunatsinni Inip attartortui 572-it 16 millioner koruuningajannik maannamut akiitsoqareerput.

Ineqarnermut, sanaartornermut attaveqarnermullu naalakkersuisoq, Atassummeersoq Knud Kristiansen, isumaqarpoq ‘killiffik ajuusaarnartoq tikissimagipput’.

Kisianni kiffaq-kontomik eqqusserusunnerluni aperineqarami, soorlu Naalakkersuisuni siuliata, Atassummeersup Sivert K. Heilmannip, akiitsut qaffakkiartorneranni siorna tamanna isumaliutersuutigigaa, Knud Kristiansenip aningaasarsianit inigisamut akiliunneqartarnissamut periarfissaq tunuarsimaarfigaa. 

- Ataasiakkaat kiffaanngissusaannut taama annertutigisumik eqquisinnaasumut iliuuseqarnissannut uanga tunuarsimaarallarpunga. Ukuami akiligassaminnik nakkutiginnittanngitsut attartortut piffissaq eqqorlugu akiliisartut eqqarsaatigalugit ataatsimut isigalugit ikittuararsuupput, Knud Kristiansen Sermitsiaq.AG-mut oqarpoq.

Kommunit peqatigalugit pissutsit misissorusuppai
Knud Kristiansenip taarsiullugu Inimut akiitsoqalertartut atugarisaat misissuiffigerusuppai. Taamaaliorusuppoq kommuunit peqatigalugit, kommuunimmi attartortut inuttut atugarisaannut ilisimasaqartarmata.

- Ilisimatinneqarpungami attartortut akiitsoqalersimasut amerlasuut ineqarnerminnut akiligassaminnut akissaqaraluartut, Knud Kristiansen oqarpoq, nangillunilu:

- Tamatuma kingorna qanoq ingerlariaqqissanerluta nalilerumaarparput.

Nunatsinni Inip attartortuini 389-ini anisinneqartussatut inissisimasuni nunatta kujataani illoqarfimmi Narsami 89-it najugaqarput.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER