Ilulissat

Knud Kristiansenimut qisuariaateqartorpassuit: Mittarfiliortoqarli

Project Newportip nunanit allanit aningaasaliiffigineqarsinnaanera Naalakkersuisunit atortussaatinneqannginnera qisuariarfigineqangaatsiarpoq

Takornariarpassuit Ilulissanukartarput ukiuni kingullerni 20-ni, taamaattumik naaggaarneq paasisinnaanngilara, Arne Niemann oqarpoq

Takornariarpassuaqalernissaa Kalaallit Nunaanni illoqarfinnit piareersimaffigineqanngilaq, angallannermut naalakkersuisoq Knud Kristiansen sisamanngormat oqarpoq.

Ilulissani Newportimut siunnersuutigineqartut sullinneqarsinnaanavianngillat, aamma nunanit allanit aningaasaliiniartut nunatta karsianut iluaqutaanavianngillat, oqarpoq.

Taama oqaaseqarnera Sermitsiaq.AG-mi atuartartunit qisuariarfigineqangaatsiarpoq.

Ilulissani suliffeqarfimmi Halibut Greenlandimi pisortaasoq Niels Thomsen qisuariaateqartut ilagaat. Knud Kristiansenip oqaasii tupigusuutigai:

Iluliarmiut aalajangiisariaqartut
- Eqqarsariaallannaq. Najugaqarfitsinni pissutsit qanorlu eqqarsarnerput nammineq ilisimaneruarput, taamaammat imatut oqarsinnaasorivunga: Piareeqqavugut aamma piumaqaagut.

- Najungaqarfiup inui ineriartorusupput, politikkikkulli "qitiusumiit aqutsilluni ineriartorusunnerput kingaallassimaartinneqarniarpoq. Inuiattut nikeriassangutta aningaasarsiornerlu perrattumik ineriartortissagutsigu annikitsuaqqamik qanimullu isinginerusumik eqqarsartuarneq qimattariaqarparput, KNI-mi siulersuisuni siulittaasuusoq Niels Thomsen oqarpoq.

Tele-Greenlandimi pisortaasoq Søren Lennert Mortensen qisuariaateqarportaaq.

Anguniakkat amerlanerusut
- Siunissamut ataavartussamik anguniagaqarsinnaanermut suliniut siunniuteqataasimasinnaagaluarpoq. Suliniummi assigiinnarpaa nukissiorfinnik sanaartortoqaleruttormat.

- Oqallinneq angallannermut tunngassuteqartorujussuuvoq. Ilulissani takornarialerineq periarfissatsialassuugaluarpoq, tamattami suleqatigiissutigisinnaagaluarparput. Suliniut sooruna utaqqiinnarneqassava? Søren Lennert Mortensen allappoq.

Misilittagaqarluarneq
Ilulissani takornarialerinikkut sullissisoq naalakkersuisumut aamma oqariartuuteqarpoq.

- Naalakkersuisoq qanoq sivisutigisumik takornarialerisimanersoq ilisimanngilara. Ilulissani kinguaariit marluk tamanna sulissutigaat. Takornarialerisoqassanngippat allanik inuussutissarsiutaasunik ujaasissaagut, Niemann allappoq.

Inatsisartuni suliaqartut ilisimasaqanngitsuusut Lars K.S. Olsen allappoq.

- Mittarfinni akileraarutit naaggaartoqarpoq. Ilaasunut akitsuusiineq Kalaallit Nunaata oqaluttuarisaanerani politikkerit kukkussutaat annersaavoq.

Atuartartut amerlanerpaat neriuutigaat naalakkersuisoq aningaasaliinianut isumaqatiginninniarnissaa, aningaasaliiniartunuimmi Siemens ilaavoq.

Powered by Labrador CMS