tusagassiutit

Knud Fleischer siulittaasutut tunualerpoq

Sinerissami radioqarfiit tv-qarfiillu peqatigiiffiat STTK immikkut ittumik ataatsimeersualerpat nutaamik siulittaasumik qinersisoqassaaq

STTK-mi siulittaasutut Knud Fleischer tunuarniarpoq peqatigiiffik immikkut ittumik ataatsimeersualerpat

STTK-mi siulittaasoq Knud Fleischer aalajangerpoq siulittaasutut tunuarniarluni. STTK-mi ilaasortat ataasinngornermi unnukkut ataatsimiisinneqarneranni tamanna nalunaarutigaa.

STTK-mi immikkut ittumik ataatsimeersuariaqqusissut qanittumi nassiunneqassaaq tassanilu naatsortuutit kukkunersiukkat saqqummiunneqassapput. Maanna siulittaasutut tunualersup peqatigiiffiup ingerlanerlunnera tamaat akisussaaffigiumanngilaa.

- Suliarinnissinnaasut misissoreerlugit STTKp allattoqarfia Sisimiut Tusaataannut ukiut marluk matuma siorna inissinneqarpoq, kisianni nassuerutigisariaqarparput ingerlanneqarnerata naammaginannginnera, Knud Fleischer oqarpoq.

Peqatigiiffik isornartorsiorneqarpoq ukiuni marlunni naatsorsuutinik kukkunersiukkanik saqqummiussisimannginnami.

- Naatsorsuutit kukkunersiukkat piareersimapput taakkulu immikkut ittumik ataatsimeersuarnermi saqqummiunneqarumaarput, Knud Fleischer oqarpoq.

Sinerissami illoqarfiit tv-qarfiit radioqarfiilu aningaasatigut assoralisimaarpput. STTK ukiut marluk matuma siorna ataatsimeersuarmat peqatigiiffiit 13-upput. Maanna peqatigiiffiit qulingiluaannanngorsimapput arfineq marluinnaat STTK-mi ilaasortaallutik Nuuk TVp aamma Arctic TVp ilaasortaajunnaarnerisa kingorna.

Powered by Labrador CMS