KNTK isikkamik arsaattartut akerleriinnerinut akuliukkusunngitsoq

KNTK, Kalaallit Nunaani Arsaattartut Kattuffianniit (KNAK) nunanut allanut sungiusaasup soraarsitaasimanera pillugu nassuiaammik nassinneqarpoq, tassungalu tunngatillu KNTK siulittaasuata Nuka Kleemannip erseqqissaatigaa, "inunnut ataasiakkaanut tunngasunut sulianut" akulerunniaratik.

Aamma atuaruk: Nunanut allanut unammisartut peqataajunnaarnissartik eqqarsaatigaat

- Kalaallit Nunaanni Timersoqatigiit Kattuffiat timersoqartigiiffinnut qulingiluanut kattuffiuvoq. Timersoqatigiiffiit tamarmik immikkut malittarisassaqarput, taamaalillutillu ulluinnarni ingerlatsinermi nammineersinnaatitaallutik, matumani ilanngullugu inunnik ataasiakkaanik suliassanngortitsisarneq, Nuka Kleemann tusagassiuutinut nalunaarummi allappoq.

- KNTK-imit nunatta karsianit Tips og Lotto-miillu aningaasaliissutit timersoqatigiiffimmit atugassarinngisaannut atorneqartut paasineqarpata, taamatullu malittarisassanut allanut naapertuutinngittumik atuisoqarluni taava KNTK qanoq iliuuseqarsinnaassuseqarpoq timersoqatigiiffimmullu pineqartumut aaqqiinisamik piumasaqaateqarsinnaalluni, KNTK siulittaasua erseqqissaavoq.

Aamma atuaruk: KNAK: Nunanut allanut unammisartut sungiusaasuata soraarsitaasup isumaqatigiissutini malinngilaa

Unammisartulli nunanut allanut unammisartunut sungiusaasumik aapakaatut bananitortartutut nittarsaassinera pillugu, siullitaasoq allappoq:

- Nunanut allanut unammisartunut sungiusaasoq allamiujuluarfigineqarmat KNAK erngerluni iliuuseqarpoq unammisartoq allamiujuluarnermik iliuuseqarsimasoq timersuutimiit mattullugu. Taamaattumik KNAK-mit malittarisassat malinneqarput, tamannalu suliassatut immikkoortutut taamaalilluni matuneqarluni.

Aamma atuaruk: Futsalimi unammisartunut sungiusaasoq taamaatippoq: GBU-mut tatiginninngilanga