Skip to main content

KNT-imi pisortaasimasoq: Isumaqatigiissuteqarluta kinguaattooqqavugut

Piginneqatigiiffik KNT-imi pisortaasimasoq, Mikael Petersen, Sermitsiaq.AG-mut ilisimatitsivoq KNT Akileraartarnermut Aqutsisoqarfimmik isumaqatigiissuteqarluni ukiut tamaasa akileraarutinik A-nik kinguaattooruteqartartoq

Nuuk TV-mit pingasunngornermi paasissutissiissutigineqartutut tunitsivik KNT, Kalaallit Nunaanni Tunisassiorfik, ilaatigut Niaqornani tunitsivimmik ingerlataqartoq, akilaarutinik A-nik ilanngaasarsimagaluarluni Akileraartarnermut Aqutsisoqarfimmut ingerlatitseqqiisarsimanngilaq.

Piginneqatigiiffik ilaatigut Siumumi politikerimit nuimasumit, aalisarnermut, piniarnermut nunalerinermullu naalakkersuisumit, Karl-Kristian Krusemut kiisalu Siumup aaqqissuussaanikkut siulittaasuata tullianit, Mikael Petersenimit 2010-mi aallartitseqataaffigineqartoq, Nuuk TV-ip paasissutissaatai najoqqutaralugit akileraarutinik A-nik sulinermullu akileraarutinut katillugit 1,2 millioner koruuninik Akileraartarnermut Aqutsisoqarfimmut akiitsoqarpoq.

Kisianni suliffeqarfiup pisortaanerisimasaata, maanna soraareersup, Mikael Petersenip, taamatut akiitsoqarneq nassuiaatissaqarnerarpaa.

Atuaruk: Siumumi politikerip nuimasup piginneqataaffigisaa akileraarutinut akiitsoqartoq

Isumaqatigiissuteqarlutik kinguaattoortarput
Suliffeqarfiup tunitsivittut ingerlasup pisortarisimasaata, Mikael Petersenip, suliffeqarfimmut pisortatut Karl-Kristian Krusep suliffeqarfiup siulersuisuinit siorna decembarip qulingiluaani ataatsikkut tunuaqateqartup, Sermitsiaq.AG-mut nassuiaatigaa KNT ukiut tamaasa ukiamiit ukiuunera ilanngullugu akileraarutinut A-nut kiisalu sulinermut  akileraarutinut kinguaattooruteqartartoq, suliffeqarfiup tunisassiai Nunatta avannaa sikugaangat nassiunneqarsinnaajunnaarmata.

- Taamaammat ukiut tamnaasa akileraartarnermut tunngatillugu pisortanut isumaqatigiissuteqartarpugut akilersuinissamut tunngasumik, soorlu aamma allat taamaaliornissaminnut periarfissaqartartut, Mikael Petersen, Siumumi siunnersortitut atorfininnermi kingorna KNT-imi pisortatut tunuartoq taama nassuiaavoq.

Suliffeqarfik maanna nutarsarneqartoq
Mikael Petersen, KNT-imi nutaamik pisortaqalernissaata tungaanut, suli suliffeqarfimmut attuumassuteqartoq, nangilluni nassuiaavoq KNT ukioq manna nutarsarneqartoq, tunisassiassallu nutaat ingerlatilerumaarai aamma naatsorsuutigineqartoq.

- Taakkualu naammassippata KNT-ip aningaasaqarniarnikkut nukittunerulernissaa anguneqarsinnaassaaq. Mikael Petersen oqarpoq.

Taannalu ima nangippoq:

- Taakku suliat kukkunersiuisuvut peqatigalugit ingerlanneqarput aammalu Akileraartarnermut Aqutsisoqarfik ilisimatittarlugu.

Mikael Petersen KNT-ip piunera tamaat aningaasarsiaqarani sulisimasoq aamma ilisimatitsivoq KNT pisortanit sukkulluunniit taperneqanngisaannarsimasoq.

Karl-Kristian Kruse KNT-i pillugu apersorneqarusunngilaq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER