KNR: Naammangittaalliorneq ileqquusunik paatsuuineruvoq
KNR TV-kkut qinersisartunik marlunngormat ataatsimiisitsinermut naammangittaalliuteqarneq pillugu KNR allappoq ataatsimiisitsinerit tassaasut qinersisartut ataatsimiisinneri. KNR isumaqarpoq naammagittaalliornermi ileqquusartut paatsoorneqarsimasut.
Qinersisartunutmarlunngormat TV-kkut ataatsimiisitsineq partiinit naammagineqannginnera pissutigalugu Partii Naleqqap Inuit Ataqatigiit suleqatigalugit Ilulissani qinersisartunik ataatsimiisitsiniartoq, Sermitsiaq.AG-ip pingasunngormat allaaseraa.
Allaaserisami tassani Partii Naleqqap Inatsisartunut qinigassanngortitaata Pele Brobergip KNR naammangittaalliuutigaa.
- Isiginnittariaatsivut innuttaasut anngukkusuppagut. Oqallitsitsineq pilersaarusiornerlutaavoq, politikkerinullu apeqqutigineqartut partiinit qanoq akissuteqarfiginissaat paasinareerlutik. Taamaammat isummersimavugut oqallitsitsinermi nutaami innuttaasut qineqqusaartunik naapitaqaqqissasut, Pele Broberg pingasunngormat Sermitsiaq.AG-mut oqarpoq.
KNR: Qinersisartut ataatsimiinneraat
KNR-ip pisortaanera Karl-Hendrik Simonsen naammangittaalliuummut akissuteqarluni oqarpoq KNR-imi qinersisartunik ataatsimiisitsinerit tassaasut qinersisartut ataatsimiisinneqarneri, ileqquusoq tassaasoq qinersisartunik qaaqqusineq, taamaasillutillu namminneq apeqqutissaminnik pingaaruteqarsorisaminnik apeqquteqarfigisinnaasaat.
- Taamaammallu ataatsimiisitsineq partiit pillugit aaqqissugaanngilaq, KNR-i mikrofonimik politikerinut tunniussisuuginnarluni. KNR politikerit qinersisartut apeqqutaannik akisarnissaat qulakkeerinnittussaavoq.
KNR: Partiit ataatsimiisinneqanngillat
KNR naapertorlugu ataatsimiisitsineq partiit pillugit aaqqissugaanngilaq.
- Pele Broberg-ip aammattaaq qinersisartut apeqqutai nalunanngereernerarpai, tamaatut naliliinera isumaqarpunga qinersisartunik nikassuinerusoq. KNR-imi qinersisartut nammineq isumaminnik pingaaruteqartunik apeqquteqartarnerat ataqqivarput. Qinersinermut demokratimullu pingaaruteqarluinnarpoq qinersisartut akuunissaat, apeqqutigerusutaminnillu aperisarnissaat.
Arlaleriarlutik qineqqusaartitsinerput
Sermitsiaq.AG-ip pingasunngormat allaaseraa Partii Naleqqap Inuit Ataqatigiit suleqatigalugit Ilulissani qinersisartunik ataatsimiisitsiniartoq.
- Maanna Partii Naleraq ataatsimiisitsiniarpoq, tassanilu imminnut apeqquteqartarniarput namminnerlu akissuteqarfigisarlugit. Qinersisartunit tusagassiortunillu akornutaaginnartussanit apeqquteqarfigineqaratik. Soorunami tamanna KNR-ip, inuiaqatigiinnut kiffartuussisartutut, ileqqussatut imaluunniit malittarisassatut pisussaaffiginngilaa. Nammineq tamanna isumagisariaqarpaat, Karl-Henrik Simonsen oqarpoq.
Karl-Henrik Simonsenip aamma nassuiaatigaa, KNR-ip qinersisartunik ataatsimiisitsisarnera KNR-ip qinersinissamut tunngasunik pilersaarutaasa arlallit ilagiinnaraat.
- Kingusinnerusukkut partiit qaaqqunikuuagut qineqqusaarnermi apeqqutinut pingaaruteqartunut peqataanissaannut. Apeqqutit pingaarutillit ilaatigut ukuusut: Aalisarneq, meeqqat atuarfiat, naamminiilivinnissarlu. Qinersisartunik ataatsimiisitsinerit ataatsimut akunnernik 18-inik sivisussuseqartussaapput, immikkullu sammisaqarluni ataatsimiisitsinerit akunnernik 8-nik sivisussuseqarlutik, Karl-Henrik Simonsen oqarpoq.