KNR: Isornartorsiuisoqaraluartoq oqallinneq aallakaatinneqassaaq

Inuit Ataqatigiit aamma Siumup partiimi siulittaasut akornanni akerleriilluni oqallinnissamut pilersaaruteqarnini attatiinnarlugu, tusagassiorfiup innuttaasunik sullissisup marlunngornermi nalunaarutigaa. Naak tusagassiorfiup taakku partiit salliutinneqarnerinik pasillerfigineqararluartoq tamanna pivoq.

Apriilip 22-anni tv-kkut oqallinnermi Inuit Ataqatigiit aamma Siumup siulittaasuit kisimik peqataasussaammata, KNR-ip taakku salliutikkai, Suleqatigiissitsisut, Nunatta Qitornai, Atassut, Partii Naleraq aamma Demokraatit pasilliuteqarput.

KNR-ip nalunaarutaa naapertorlugu, Nunatsinni partiit annersaat marluk akileriisillugit KNR-ip oqallitsitsisarneri tamat oqartussaaqataanerannut pingaaruteqarpoq.

- Partiit annerit marluk siunissamut takorluugaat tassani itisilersinnaasarmassuk pingaaruteqarpoq. Partiimmi annerit marluk arlaat siuttunngortussaanera ilimanarsereertarpoq, tamaalillunilu ukiuni tullerni sisamani akisussaasussaassallutik, KNR-ip Nutaarsiassaqartitsivianni qullersaaasoq Mikkel Bjarnø Lund oqarpoq.

Aamma atuaruk: KNR: Poorskereerpat nalilersueqqissaagut

KNR: Partiit tamarmik tusaaneqassapput

Qinersisoqalernerani arfineq marloriarluni qinersisartunik ataatsimiititsinerit KNR-ip ingerlattarpai, oqallinnerit sisamat aammalu partiit siuttuisa tamarmik peqataaffigisaannik oqallittoqartarluni, akileriisillugit oqallitsitsinerit saniatigut ulloq qinersiviusup unnukkuutaani immikkut ilisimasalinnik peqataasoqartillugu aallakaatitsisoqartarluni.

- Partiit tamavimmik qineqqusaarnerup nalaani oqariartuutiminnik apuussinissaannut periarfissaqarput, taamaammallu qinersisoqarnissaa sukumiisumik sammineqarnissaa isumaga malillugu qulakkeertarlutigu. Akileriilluni oqallittarnerit matumani qinersisartunut tapertaalluartutut taasariaqarpoq, tassa partiinik immikkoortitsisoqarani, nutaarsiassaqartitsinermut pisortaq, Mikkel Bjarnø Lund oqarpoq.

Suleqatigiissitsisut, Nunatta Qitornai, Atassut, Partii Naleraq aamma Demokraatit sapaatip-akunnerata siuliani Inuit Ataqatigiit aamma Siumut partiit minnerusut ersoqatigalugit, KNR-ip aallakaatitsinissani attatiinnassappagu, akerleriilluni oqallinnermut peqataanissartik taamaatissagaa kaammattuipput.

Aamma atuaruk:Partiit: KNR-ip IA aamma Siumut salliutippai