KNR: Ajornartorsiut aaqqissappat allanngulertoqartariaqartoq, immikkoortortaqarfimmi aqutsisoq isumaqarpoq
Tusagassiortunngorniarfimmut qinnuteqartartukippoq, KNR-ilu nutaarsiassanik ikilisaasariaqalerpoq.
Ukiup sinnera knr.gl-ikkut nutaarsiassanik ikinnerusunik saqqummiussisalernissartik sapaatip-akunnerata siuliani KNR-ip nalunaarutigaa. Taamatuttaaq nalunaaqutaq arfinermut radioavisertitsisarunnaartoqarnissaanik Qanoruumillu aallakaatitsisarnerit ikilisinnissaanik nalunaaruteqarpoq.
Taamak allaaserinnippoq aviisi Sermitsiaq.
Kalaallisut oqaasilinnik tusagassiortunit arfineq-marluusussaasunit maannakkut sisamanik amigaateqarnerat tassunga pissutaavoq. Radioavisimili tusagassiortunik amigaateqarneq sutigut tamatigut eqquivoq, tassami KNR nukissanik pigisaminik nikerartitsisariaqalersimavoq.
Nunatsinni tusagassiorfimmi innuttaasunik kiffartuussisumi aatsaat ajornartoortoqanngilaq. 2022-mi nutaarsiassaqartitsivik nutaarsiassanik aamma ikilisaasariaqarsimavoq.
Inissisimaffik KNR-ip sulisuinut inuiaqatigiinnullumi ukiup sinnerani nutaarsiassanik ikinnernik tusartalertussanut pitsaasuunngilaq. Taama KNR-ip pisortaa, Annga Lynge, ukioq manna septembarip aallaqqaataani atorfinittoq, oqarpoq.
Arriilliallalaartariaqarnerput pitsaasuunngilaq pisariaqarlunili, immikkoortortaqarfinni suliamik nuannarinninneq kissaatigineqartoq qulakkeerneqassappat. Inuiaqatigiinnut nutaarsiassatsialannik ikinnerusunik tunniussisariaqalernerput oqitsuinnaanngilaq.
Atorfinni qaammatit marluk issiasimalereerputit. KNR-imi ajornartoriuterujussuusut aaqqiviginiarlugit qanoq iliuuseqarpit?
Nutaarsiassaqartitsivimmi sulisussanik nutaanik kajungilersitsinissamut suna ajornartorsiutaanersoq paasiuminaatsinneqarpoq. Ajornartorsiutit annertupput, kisianni aqutsisullu suliaq ataavartumik ingerlapparput. Januarimi periusissiamik ingerlatsilluta aallartissaagut, siornatigut taamaaliortoqarsinnaanikuusimanngilaq, juullilli tungaanut qanoq iliussanerluta oqaasinngortariaqarparput, Annga Lynge oqarpoq.
Ukiorpanni sumiginnaaneq
Ilisimatusarfimmi tusagassiortunngorniarfimmi ilinniartussaaleqisoqarportaaq. Tusagassiortunngorniarfiup immikkoortortaqarfia ukiorpanni amerlanerit ilinniakkamut qinnuteqartinniarlugit pilerisaarutinik quppersakkanillu misileraanikuupput. Taamaakkaluartoq bacheloritut ilinniarfimmut qinnuteqartartut amerliartunngillat. 2019-imiit 2023-mut aqqanillit ilinniakkaminnik naammassinnipput, ukiullu ingerlanerani marluk ilinniakkaminnik naammassinninnissaat naatsorsuutaavoq.
Nutaarsiassalerivinnut tusagassiortunik kajungilersitsiniarnerup ajornartorsiutaasa ilagaat, tusagassiortutut ilinniakkaminnik naammassinnittut atorfinnik allanik ujartuisarnerat, taama oqarpoq Ilisimatusarfimmi tusagassiortunngorniarfiup immikkoortortaqarfiani aqutsisoq, Naja Paulsen.
