tusagassiutit
KNR-TV-mi inuusuttunut aallakaatitaq nutaaq
Filmit nutaat, spillit cd-illu saqqummiunneqartassapput KNR-TVip inuusuttunut aallakaatitassiaani nutaami ’Marc-ip Isiginnaarasuartaataa’-ni
Nunatsinni tv-mi isinnaartartut Marc Fussing Rosbach ilisimalertussanngorpaat. Taanna sisamanngornerit allortarlugit oktoberip pingajunaniit spilinik qarasaasiakkullu pinnguaatinik saqqummiussisassaaq inuusuttunut aallakaartitassiami nutaami ’Marc-ip Isiginnaarasuartaataa’-ni.
Saqqummiisartoq taanna nutaaq kisimiissanngilaq tassami Malik Kleist aamma Qillannguaq Berthelsen filmertarfinni filminik nutaanik cd-nillu nalilersuisassammata.
- Qarasaasiatigut pinnguaatit inuusuttut inuunerannut ilaalluinnalersimapput. Peqatigisaanik Ilulissani, Sisimiuni Nuummilu filmeriartartut filmit nutaat pillugit oqaluttuunneqartalissapput, tamarmilli periarfissaq tamanna piginngimmassuk dvd-inik taavalu cd-inik nutaanik kikkut tamarmik akuuffigisinnaasaannik oqaluttuunneqartalissapput, KNR-ip Piorsaaviani pisortaq Niels Pavia Lynge oqarpoq.
Aallakaatitassiaq sisamanngornerit allortarlugit aallakaatinneqartassaaq siullermik oktoberip pingajuat nalunaaqutaq 20.30 aallakaatinneqassalluni.