KNR sulisussaaleqisoq: Radioaviisi taamaatiinnarneqartassasoq
KNR-ip nutaarsiassaqartitsiviani tusagassiortutut atorfiit 20 procentii inuttaqanngillat, kalaallisullu radioaviisimik suliaqartarnissamut qinnuteqartoqarsimanani. Innuttaasunik kiffartuussivittut tusagassiorfiusup taamaammat ullormut radioaviisit ilaat atorunnaarsillugillu nutaarsiassiisarneq annikillisinniarpaa.
Tusagassiortorpassuit KNR-ip Nutaarsiassaqartitsivianit soraarniuteqariarlutik unammillernartunik nutaanik misiliiniarlutik, nutaamik suliffittaarnissartik qinersimavaat. Tamanna Qanoruup sivikinnerulerneranik, nittartakkami KNR.gl-imi allaaserisat ikinnerulernerannik radioviisillu ikilillutillu sivikillinerannik kinguneqassasoq, tusagassiivimmit ilisimatitsissutigineqarpoq.
IA-lu sinnerlugu Inatsisartuni ilaasortap Mariia Simonsenip tusagassiorfitsigut nalunaaruteqarluni tamanna ajornartorsiutaanerarpaa. Mariia Simonsenip KNR-imi pisortaq Karl-Henrik Simonsen qatanngutigaa.
Mariia Simonsen naapertorlugu, KNR-imit oqaatigineqarsimavoq, tusagassiortorpassuit atorfinnut aningaasarsiarissaarfiunerusunut nuuttarnerat tusagassiortunik amigaateqalernermut pissutaasoq.
- Naalakkersuisunut kaammattuutigerusupparput tusagassiortunngorniartarnermik nukittorsaaqqullugit, Namminersorlutillu Oqartussat suliassaqarfiini tusagassiortut pitsaanerusumik aningaasarsiaqartinneqartarnissaannik neqerooruteqartoqartarneratigut nutaarsiassaqartitsivimi tusagassiortut ikiliartulersimappata iliuuseqaqqullugit kaammattorpavut. Inuiaqatigiittummi tamanna attassinnaanngilarput.
Tusagassiortut suliaminnut tunniussimasussaasut
Mariia Simonsen tusagassiortutut ilinniagaqarpoq, Inatsisartunullu ilaasortanngunngikkallarami Ilisimatusarfiup tusagassiortunngorniarfiani ukiuni arlaqartuni ilinniartitsisarsimalluni.
Tusagassiorfimmi Sermitsiaq.AG-mi pisortaaneq Christian Schultz-Lorentzeni aamma isumaqarpoq tusagassiortunngorniartarneq qaffanneqartariaqartoq.
- Tusagassiortoorusukkaanni suliamut tunniussimasariaqarpoq. Tusagassiisarnikkut allanngueqataarusunneq tusagassiortutoqqanillu pitsaanerusumik suliaqarsinnaaneq anguniarneqartariaqarluni. Taakkuli anguneqassappata Tusagassiortunngorniarfiup ilinniartussat pimoorusserusuttut tigusinnaasariaqarpai.
Pisortaanerup aamma oqaatigaa, Ilisimatusarfimmit ilinniartut ilinniarneranni tusagassiortutut suliaqarnissamut kajumissuseqarnerulersinniarneqartariaqartut, paasissutissiisartutullu atorfeqalernissaannut kaammattornagit.
- Taamatummi pisoqartartutut isikkoqarpoq, tamannalu misissorneqartariaqarpoq. Maannakkorpiaq misissorneqartariaqarpoq – oqartussaaqataanermummi tamanna annertuumik ajornartorsiutaammat – aaqqiissuteqapallalluni tusagassiortut piffissami sivikitsumi ilinniarteqqinneqartarnissaat eqqarsaatigineqarsinnaavoq, soorlu assersuutigalugu atuarfinni ilinniartitsisut taamatut pineqartartut.
KNR aningaasarsiassatigut aquttuussanngitsoq
Pisortaanerup oqaatigaa, KNR-imi tusagassiortut aningaasarsiaannik qaffaanissaq aaqqiissutissaanngitsoq.
- KNR-imi tusagassiortut tusagassiorfinnit allanit qaffasinnerusumik aningaasarsiaqartinneqarnissaat isumaqanngilaq. KNR pisortat suliffeqarfiutigaat. Tusagassiorfiit namminersortut, soorlu kiffaanngissuseqarluni tusagassiorfiusut namminneq isaatitsisussaapput aningaasarsianillu qaffaanissamut akissaqanngitsut aamma eqqarsaatigineqartussaammata.
Kalaallisut oqaasilinnik qinnuteqartoqaryannginnera ajornartorsiutaasoq, KNR-imi nutaarsiassaqartitsivimmi pisortaq Alice Sørensen ilisimatitsivoq.
- Assersuutigalugu radioaviisimi tusagassiortutut kalaallisut oqaluttunut atorfiit inuttalerneqartussat, apriilip 15-iata tungaanut qinnuteqarfigineqarsinnaasut, suli qinnuteqarfigineqanngillat. Akerlianik danskisut oqaasilimmik tusagassiortussarsioratta 16-it qinnuteqarput.