Oqaatsit

KNR oqaatsit atorneqarneri pillugit: Pitsaanerusinnaavugut

Tusagassiorfik innuttaasunik kiffartuussisoq kalaallisut aallakaatitsinerminni kukkugajuppallaarpoq, innuttaasoq isumaqarpoq. KNR oqaatsitigut pikkorinnerusinnaasoq, KNR-ip pisortaata nassuerutigigaa

Klaus Frederiksen Nuummiu, KNR-ip oqaasitsinnik atuineranut sakkortuumik isornartorsiuivoq. Sermitsiami kingullermi saqqummersumi atuartartut allagaanni atuarneqarsinnaavoq.

- Nunatsinni tusagassiorfiit annerpaartaat KNR, oqaatsit pillugit mianerinninnissamik pisussaaffinnik, uani eqqarsaatigaakka oqaatsinik eqqortumik atuinissamik, pisussaaffeerussimalluni?, Klaus Frederiksen aperivoq.

Pisussaaffeqartoq
Tusagassiorfik innuttaasunik kiffartuussisoq, kalaallisut oqaatsivut eqqortumik atorneqarnissaannut akisussaaffeqartoq, taanna isumaqarpoq.

- KNR Radio aammalumi KNR Tv tassaaniartussaagunaraluarput, oqaatitsinnik mianerinnittussat, eqqortumillu atuinissamik qaammarsaaniartussaagaluit, minnerunngitsumillu oqaatsivut pillugit mia-nerinninnissamik siaruarteriniartussaagaluit. Qularnanngilaq siulersuisuisa tamanna pisussaaffik ilisimagunaraluaraat, taamaattorli aaqqiiniarnissamut piumassuseqanngilluinnartutut isiginartut, Klaus Frederiksen oqarpoq.

KNR-ip oqaatsit kukkusumik qanoq atortarnerai taanna aviisimi assersuusiorpoq:

- Ukiuni makkunani kiisa anorimut tungatillugu sakkortussutsit, taarserneqarput sukkassutsimik, allaat silassamik taaguinnermi, oqartoqartalerluni assersuut: Avannaq kangisik 8 – 13-imut sukkassusilik, tassanilu sakkortussuseq pineqarani, sukkassuseq pineqarluni. Allanngilaq anori, angallammut sumulluunniit nammineerluni ingerlaartumut assersuullugu eqqartorneqartoq.

Taassuma aamma Qanorooq oqaatsinik kukkusunik atuinerarpaa.

Nutserinerit
Tusagassiorfiup innuttaasunik kiffartuussisup oqaatsivut iluamik atorneqartannginneri isornartoqartoq, Klaus Frederiksen isumaqarpoq.

- Qularnanngitsumik matumani nutseriinnarnersuaq peqqutaasut annersaat. KNR-ip oqaatsit atorneqartut qanoq pitsanngorsarnissaannut pisussaaffeqarnersoq paaserusuppara, Klaus Frederiksen oqarpoq.

Oqaasileriffimmik suleqateqarneq
Apeqqutit Sermitsiaq.AG-p, KNR-ip pisortaaneranut, Karl-Henrik Simonsenimut toqqaannartumik ingerlateqqippai.

Oqaatsivut pillugit isornartorsiuineq assortorneqarsinnaanngitsoq, taassuma ilisimatitsissutigaa.

- Ukiuni kingullerni oqaatsinik atuinerput pillugu isornartorsiorneqartarpugut. Aqutsisulli oqaatsivut eqqortumik atorneqarnissaat pillugit pitsanngorsaajuarput.

Nutaarsiassaqartitsivinni aaqqissuisut kalaallisut pikkorissartinneqartarput pitsaassuseq qaffassarniarlugu, Karl-Henrik Simonseni paasissutissiivoq.

- Oqaasileriffik suleqatigaarput, ukioq mannalu Oqaasileriffik KNR-imi sulisunut pikkorissartitsinernik ingerlataqassasoq, Karl-Henrik Simonsen oqarpoq.

Inuiaqatigiinni ajornartorsiut
Oqaatsitta eqqortumik atorneqartarnissaat inuiaqatigiinni ajornartorsiutaasoq, taassuma uparuarpaa.

- Ajornartorsiut inuiaqatigiinni annertuumik takussaavoq, meeqqat atuarfianiit naammassisut soraarummertartut oqaatsitigut piginnaasaat annikippallaartarput, tamaalillutit tusagassiortutut ilinnialeraangamik oqaatsinik piginnaasaat ilaatigut amigartarput, tamannalu sorunami KNR-mut aamma kinguneqartarpoq, Karl-Henrik Simonsen oqarpoq.

Powered by Labrador CMS