kommunimut qinersineq
KNR neriorsuivoq: Sulisut politikerit soraarsitaanavianngillat
Hans Jukku Noahsen aamma Uju Petersen qineqqusaareerunik tusagassiorfimmut innuttaasunut kiffartuussisumi aallakaatitsivimmeeqqilissapput, KNR-imi pisortaq Karl-Henrik Simonsen oqarpoq
Naak kommunalbestyrelsimut qinigaagaluarunilluunniit, KNR-imi sulisut politikerit marluk tusagassiorfimmi innuttaasunut kiffartuussisumi suliffimit annaanissaat ernumassutigissanngilaat.
Karl-Henrik Simonsen, KNR-imi pisortaq Sermitsiaq.AG-mut oqarpoq.
Hans Jukku Noahsen aamma Uju Petersen kommunimut qineqqusaartoqarnerata nalaani qineqqusaarmata aallakaatitassiornermit peertinneqarsimasut, tusagassiorfik innuttaasunik kiffartuussisup nittartakkamini tallimanngormat allappoq.
Atuaruk: KNR-ip aalajangernera Hans Jukkup iluarinngikkaa
Iluaqutigissanngikkaat
Kisianni qinersisoqareerpat aallakaatitseqqissinnaalissapput, KNR-ip pisortaa Karl-Henrik Simonsen oqarpoq.
- Qinersisoqareerpat suliffimminnut utissapput, taanna oqarpoq.
Hans Jukku Noahsen aamma Uju Petersen 'qineqqusaartoqarneranut atatillugu iluaqutserneqassanngimmata, KNR-ip sulisut marluk peerniarlugit aalajangersimasoq taanna nassuiaavoq.
- Qinigassanngortittut allat sulisutsitut aallakaatitassiornissamut periarfissaqanngillat. Kisianni qinersisoqareerpat, Hans Jukku Noahsen aamma Uju Petersen aallakaatitassioqqilissapput, kisianni taakku politikkimut tunngasumik aallakaatitsisassanngillat, KNR-ip pisortaa nassuiaavoq.
- Sooruna taama kingusitsigisumik nalunaaruteqarpisi?
- Qineqqusaarnerup aallartinnerata kinguninngua taamatut aalajangernikuuvugut, Karl-Henrik Simonsen oqarpoq.