KNR naatsorsuutiginngisamik sinneqartooruteqartoq
KNR-ip 2018-imut naatsorsuutai 161.423 koruuninik sinneqartoornermik takutitsipput, tamannalu pilersaarutaanngikkaluarpoq. Missingersuutini 1,14 millionit koruuninik amigartoornissaq naatorsuutigineqaraluarpoq.
Annonse
2017-imi ukiumut 2018-imut missingersuusiortoqarmat, KNR-imi aqutsisut missingersuusiornermi uniuingaatsiarput.
Millionimik amigartoornissaq naatsorsuutigineqaraluarpoq, kisianni tusagassiorfik innuttaasunik sullissisoq 161.423 koruuninik sinneqartoortumik naatsorsuutinik saqqummiussivoq.
Pissutaasut arlaqartut
KNR-ip aqutsisuinit paasissutissiissummi atuarneqarsinnaavoq, pissutsit arlaqartut naatsorsuutinik sinneqartoortitsisimasut:
- Tallimanngornikkut SMS-erluni eqquiniaatitsinernit isertitat amerlanerusut
- Akissarsianut aningaasartuutit ikinnerusut, 2018-ip ingerlanerani atorfiit inuttaqanngitsut pissutigalugit
- Suliniutip NeXT-ip kinguaattoornera pissutigalugu pikkorissarnermut aningaasartuutit ikinnerusut
- Isumaqatigiissutinut aamma pisussaaffeqarnermut aningaasartuutit ikinnerusut, tamatumnunnga annertuallaamik missingiussisimaneq pissutigalugu
- NeXT-imik suliniutip kinguaattoornera pissutigalugu atortunut aamma IT-mut aningaasartuutit ikinnerusut, taanna aatsaat 01.06.19 naammassineqarpoq
Aningaasanut inatsimmi 68 millionit koruunit
Aningaasanut inatsit aqqutigalugu KNR 68,248 millionit koruuninik pissarsivoq, tamatuma saniatigut 7,622 millionit koruuninik isertitaqarpoq. Akissarsiaqartitsinerit akisunerpaapput, taakku 43,4 millionit koruuniupput, atorfinnut aalajangersimasunut 92-inut agguataarneqarlutik.