KNR
KNR-ip tusagassiueriaatsit pingasut atorlugit oqallitseriaatsimik nutaamik pilersitsivoq
Oqallitseriaaseq nutaaq inersimasunut inuusunnerusunut saaffiginnittoq ullumi KNR-ip pilersippaa
KNR-ip tusagassiueriaatsit pingasut atorlugit oqallitseriaaseq 'Kassoq' 25-niit 35-it ukiulinnut saaffiginnittoq pilersippaa.
Kassormi oqallitsitisuussapput aaqqissuussisuullutillu Malu Pedersen aammalu Eqaluk Høegh, Johansinnguaq Olsenilu teknikkikkut aqutsisuussalluni.
- Inissaaleqinermut tunngasoq siullermeerluta oqallitsitsilerutta sammissavarput. Inuunermi namminiilerniaqqaarfimmi aporfissat siulliit angisuut taanna ilagaat. Video siulleq piareeqqavoq facebookimullu ullumi ilineqassalluni. Taama ukiullit inissaaleqinermik eqqugaasut oqaloqatiginissaat qilanaaraarput, taakkumi oqallitsitsinissamut tunngaviussapput. Oqallitsitsineq imaqarluartoq kipparippallaanngitsorlu anguniarparput, Malu Pedersen oqarpoq.
Aamma atuaruk: KNR inuusuttunut soqutiginarsarneqassaaq
Qulequttat tamarmik tv-kkut oqallinnermik naggaserneqartassasut
KNR naapertorlugu qulequttat tamarmik immikkut videonik aallarniuteqartassapput, taakku facebookimut ilineqartassapput. Tamatuma kingorna oqallinneq, aaqqissuisut raatiukkut ingerlateqqissavaat, tassani inuit apeqqutinik qisuariaatiminnillu facebookikkut toqqaannartumik allassinnaanissaminnut periarfissaqassallutik. Qulequttat tamarmik immikkut sisamanngornerit allortarlugit tv-kkut oqallinnermik naggaserneqartassapput. Issuaanerit pingaarutillit, aamma raatiukkut tv-kkullu oqallinnermit tigulaakkat facebookimut oqallisigisassanngorteqqillugit ilineqartassapput.
- Inuiaqatigiit oqallinneranni inuusunnerusut peqataanerusariaqarput. Periarfisseeqataanissarput nuannaarutigaarput neriuutigalugulu atorluarneqassasoq, Eqaluk Høegh oqarpoq.
Oqallitseriaaseq maajip qaammataata tugaanut ingerlanneqarnissaa pilersaarutaangallarpoq.