KNR-ip radioqarfik nutaaq ima akilerpaa

KNR-ip pisortaanerata Søren Lennert Mortensenip KNR-ip radioqarfimmik Nuummi aallakaatitsisartumut pisineranut paasissutissamerngit qulaajaaffigilaarpai.

Innuttaasunik sullissinissamut pisussaaffilikkap Claus Nissenimut Voice of Greenlandimeersumut 500.000 koruunit akiliutigisimavai. Nissen, aggusti 2013-imiilli tuniniaanermut siunnersortitut KNR-imut attuumassuteqalerpoq.

Atuaruk: KNR akuersissuteqarani aallakaatitsivoq

Suliffeqarfik ataatsimit ingerlanneqartoq
Suliffeqarfiit nalunaarsorsimaffianni Voice of Greenland, suliffeqarfittut sulisoqanngitsutut nalunaarsorsimavoq.

- Pisinermut ilaapput nipilersuusiortarnermut pilersaarut, nipilersuutinik nalunaarsuiffik, atortut, nittartagaq, App, sulisut aamma nittarsaassisarnermut aallaavik ineriartortinneqarnera naammasseriigaq, ilaalu ilanngullugit, KNR-ip pisortaanera Søren Lennert Mortensen ilisimatitsivoq.

Voice of Greenlandip pisiarineqarneranut atatillugu radiup piginnittorisimasaa Claus Nissen KNR-imi tuniniaanermut pisortatut atorfinitsinneqarpoq.

- Taamaalilluni Claus Nissen KNR-imi tusagassiornermut aallaaviit pigineqartut sorliuneri apeqqutaatinnagit pilerisaarutinik tuniniaassaaq, aamma radiukkut kanalip nutaap inuusuttunut sammisup nuukkiartuaarnerani ikiuutissalluni, KNR-ip pisortaanera allappoq.

Atuaruk: KNR-ip sulisuminit radioqarfik pisiaraa

Pilerisaarutinit isertitassat
Radioqarfik nutaaq pilerisaarutigut ukiumut 1 millionit koruunit missaannik isertitaqartassasoq naatsorsuutigineqartoq, tamannalu KNR-ip aningaasalersorneqarneranut naapertuuttoq Søren Lennert Mortensen ilisimatitsivoq.

- Annertuumik sinneqartoorutaanissaa isumaanngilaq, kisianni takkukkumaartussat imarisaata ineriartortinneqarneranut naalaartartunut inuusunnerusunut sammisut ineriartortinneqassapput, KNR-ip pisortaanera nassuiaavoq.

KNR paasissutissiivoq Voice of Greenlandip pisiarinerani nalinga kukkunersiuisartunit Deloittemit nalilersorneqarsimavoq.

Deloittellu nalunaarutaa aallaavigalugu KNR-ip nalilerpaa nutaamik pisineq aningaasatigut pitsaasuusoq annertusarneqarsinnaasorlu, Søren Lennert Mortensen ilisimatitsivoq.

Atuaruk: KNR-ip KNR-Avannaa matuaa

Siulersuisut kissaatigimmassuk pisiaraat
Søren Lennert Mortensenip nassuiaanera najoqqutaralugu KNR-imi siulersuisut kissaatigisimavaat radiukkut kanalimik nipilersukkanik aallakaatitsiviusumik pilersitsisoqarnissaa pilerisaarutinik aningaasalersorneqartumik.

Sermitsiaq.AG-mit Søren Lennert Mortensen oqaaseqartinniarsimagaluarparput sulisut qassit Voice of Greenlandimit ilanngullugit pisiarineqarsimasut, suliffeqarfiimmi nalunaarsorsimaffianni Voice of Greenland suleqanngitsutut nalunaarsimammat, naak Mortensenip ilisimatitsissutigigaluaraa sulisunik ilanngullugu pisisoqartoq radioqarfimmik pisinermi.

Sermitsiaq.AG-imit aamma Namminersorlutik Oqartussanik oqaaseqartitsiniarpugut nassitsisinnaanermut akuersissutinut tunngasumik, sisamanngornerulli ualinerani ataatsimiittoqarnera pissutigalugu tamanna iluatsissinnaasimanngilaq.

Atuaruk: KNR-imi attaveqaqatigiinnermut pisortanngorlaaq suliffimmini qaffatsinneqartoq