qinersineq
KNR-ip qinersineq toqqaannartumik nittartakkakkut aallakaatissavaa
Nunarsuarmi sumiikkaluaraanniluunniit Kalaallit Nunaanni Inatsisartunut qinersineq malinnaaffigineqarsinnaassaaq toqqaannartumik knr.gl-ikkut
KNR-TV-ip qinersineq toqqaannartumik aallakaatitsinera nittartakkakkut aamma malinnaaffigineqarsinnaassaaq aqagu tallimanngornermi.
KNR tusagassiutinut nalunaaruteqarpoq.
- KNR-imi suleqatitta TV live streaming atorlugu aallakaatitsisarnissaasa siullermeernissaat qinersinermut atatilugu piareersarpaat, KNR-ip pisortaa Søren Lennert Mortensen tusagassiutinut nalunaarummi oqarpoq, nangillunilu:
- Uagut isumarput naapertorlugu kalaaleqatitta nunani allaniittut TV live streaming atorlugu politikikkut ukiup ingerlanerani pisartut pingaarnersaannut malinnaasinnaalernerat ajunngilluinnartutut isigisariaqarpoq. Kisiannili aamma Kalaallit Nunaanni politikimik namminerlu nunamik soqutigisaqartut eqqarsaatigaagut.
Toqqaannartumik aallakaatitsisarneq siunissami aamma atorneqartassasoq KNR-imit oqaatigineqarpoq.
- Nittartakkatsinni aalajangersimasumik tamanna atortalissavarput, aammalumi radiokkut aallakaatitat TV-kullu sarsuatittakkat amerlanerusut taamatut aallakaatittalersinnaanissaat naatsorsuutigaarput, Søren Lennert Mortensen ilisimatitsivoq.
- Piffissap ingerlanerani radiokkut tv-kullu aallakaatitat tusarusutat takorusutallu attataasamik toorsinikkut pissarsiarineqarsinnaalissapput, taamaasillunilu inuit ulapaartuusut piffissaqaleraangamik KNR tusarnaartarsinnaalissavaat imaluunniit isiginnaarlugu, Søren Lennert Mortensen oqarpoq.