KNR-ip aallakaatitsisarnera sivikinnerulerpoq
KNR-ip aallakaatitassiortarnera ajornartorsiornermik imatut eqqorneqarpoq, ilaatigut Poorskimi timersorneq taamaatiinnarneqarluni, KNR-ip pisortaa Karl-Henrik Simonsen paasissutissiivoq
KNR aningaasaqarnikkut imatut eqqorneqanngilaq, pc-nulli mikrofoninulllu aningaasaliisariaqarsimavoq sulisut angerlarsimaffimminni mattussaaqqasut angerlarsimaffimminnit sulisinnaaqqullugit. Tamannalu manna tikillugu ajunngitsumik ingerlasimavoq, piffissamili sivisunerusumi atasinnaassanngilaq. Ajornartorsiorneq anilluta aallakaatitassiornissatsinnik killiliivoq, aningaasaqarnitsinnilli eqquinngilaq, KNR-ip pisortaa Karl-Henrik Simonsen nassuiaavoq.
Taamaatitsinerit
– Tallimanngornikkut unnukkut aliikkusersuilluni aallakaatitassiamut Qangattamut atatillugu sinerissami angalanissat arlallit pilersaarutigisavut taamaatiinnarneqarput. Tamatuma saniatigut unnukkut aallakaatitassiap Aftenshowimut assingusup, sapaatip-akunneranut marloriarlugu aallakaatittarnissaa pilersaarutigisimavarput, taannalu maajip aallartinnerata tungaanut kinguartinneqarpoq. Poorskimi timersorneq nalinginnaasumik imaqartartorujussuaq aamma taamaatiinnarneqarpoq, coronamik ajornartorsiorneq KNR-ip qanoq misigineraa aperineqarami KNR-ip pisortaa Karl-Henrik Simonsen oqaluttuarpoq.
– Aamma radiomi TV-miluunniit pulaartoqarluni toqqaannartumik aallakaatitsisarnerit, aamma imaqarluartartut, eqqorneqarput, apersuinitsinnili oqarasuaat imaluunniit tusagassiornermi atortut elektroniskiusut allat atortarpavut. Kisiannili soorunami tamatumuunakkut akimmisaartinneqarpugut, taamalu aallakaatitat pitsaassusiat aamma eqqorneqarluni, taanna oqarpoq.
Suliniutit nutaat
– Akerlianik allannguisariaqarsimavugut, marsillu qiteqqunneraniit radiomi kalaallit nipilersuusiaannaviinik nipilersortarluta, taamaalilluta erinniortut Kodamit aningaasassaannik ikiulaarsinnaavavut, aningaasalli tamakkua aatsaat ukiup naalernerani tunniunneqartarput. Massakkorpiaq piviusuunerusumik ikiuiniarluta 250.000 koruuninik immikkoortitsisimavugut, angerlarsimaffimmi tusarnaartitsineeqqanut, TV-kut aallakaatinneqartussanut atorneqartussanik, tamatumani nipilersortartut angerlarsimaffimminni allamiluunniit nipilersortassapput TV-kut aallakaatinneqartussanik. Immiussinerit aallartissimavavut, pilersaarutaavorlu illoqarfiit tamaasa »saneqquttassagivut«, illoqarfimmi nipilersortartoq ataaseq arlallilluunniit namminneq sanaaminnik nipilersortassallutik. Aningaasat taakkua immikkut aningaasartuutaanngillat, aallakaatitassianulli allanut, maanna suliarisinnaanngisatsinnut, atugassaasimagaluarlutik, Karl-Henrik Simonsen nassuiaavoq.
KNR-ip qanoq eqqugaasimaneranik allaaserisaq tamaat Sermitsiami atuaruk - una aqqutigalugu atuarsinnaanngoruk: