kommunimut qinersineq
KNR-ip aalajangernera Hans Jukkup iluarinngikkaa
Tusagassiorfiup innuttaasunik kiffartuussisup Hans Jukku Noahseni qineqqusaarnermi nalaani aallakaatitsinerni peqataasinnaanngitsoq aalajangerpaa. Taassumalu aalajangerneq eqqumiigivaa
- KNR-ip kommunalbestyrelsimut qineqqusaarninni aallakaatitassiamiik peersinniarlunga aalajangernerat ataqqivara, taamaattoq aalajangernerat eqqumiinginartoqartillugu.
KNR-ip qineqqusaartunik aallakaatitsinermini peersitaasimanermi kingorna, Hans Jukku (IA), Sermitsiaq.AG-mut oqarpoq.
Qineqqusaartut naapeqatigiittarfinni arlalinni periarffisaqartut assersuutigalugu – Facebook, Youtube aammalu Snapchat, Hans Jukku isumaqarpoq.
- Aappatigulli aalajangerneq paasisinnaavara. KNR-imi innuttaasunik pigineqarpoq innuttaasunulli sullissisuulluni. Ingerlaannarsimangaluarumami tamanna immaqa partiinit allanit tigulluarneqarsimassanngikkaluarpoq.
Atuaruk: KNR-ip sulisui qinigassanngortittut marluk aallakaatitassiornermit peerneqartut
Oqallittoqarnissaanut kaammattuivoq
- Ajornanngitsuararsuuvormi KNR-imut isornartorsiuvisarneq, isumaqattarpungummi suliffeqarfik nammineq pigalugu, taamaammat aalajangerneq paasivara. Kisianni aalajangerneq eqqartorneqarsinnaavoq.
Sammisallu oqallisigineqarnissaanut pisariaqartoq, isummerluni.
- Kikkut tamarmik qinigassanngortissinnaanerminut pisinnaatitaaffeqarput, isumaqarpunga sumi suliffeqarnera apeqqutaatinneqartariaqanngitsoq. Suliffinni sungiusimareerpara partiilersorsinnaananga, allanillu partii sorlermiinnera atorlugu sunniiniarneq ajorlunga, Hans Jukku Noahsen oqarpoq.
Suliinnassaaq
Qineqqusaarneq naammassippat suliffiminut uternissani naatsorsuutigaa.
- Qinigaassangaluaruma suliffinniik tunuarnissannut peqqutissaqanngilanga, kommunalbestyrelsimut ilaasortaajutigaluni saniatigullu innuttaasunik sullissinnermik suliaqarnissani ajoriffissaqartinnagu, Hans Jukkup paasissutissiaraa.
Marlunngorpat kommunalbestyrelsimut qinersisoqareerpat suliffimminut uternissani paasissutissiaraa.
Atuaruk: Tv-imi quiasaarisartoq kommunimut qinigassanngortittoq