KNR HD Atorlugu aallakaatitsisalersoq
Naalakkersuisut, Tele-Post KNR-ilu suleqatigiillutik TV-kkut aallakaatitsisarneq nutartersimavaat, maannalu KNR 1, KNR 2 DR-ikkullu kanaalit akeqanngitsumik aallakaatitsisartut HD atorlugu aallakaatitsisalerput.
Kalaallit inuiattut ullorsiorneranni siullermeerluni HD TV Kalaallit Nunaannut tamarmut aallakaatitsivoq.
Taamaalilluni kanalini assigiinngitsuni tv-kkut assitaliussat marloriaammik pitsaanerulerput, Tele-Post ilisimatitsivoq:
- HD erseqqarinnerummat attavik immikkuualunnerusumik assitaqarpoq kiisalu qalipaatinik, mikisuaqqanik aalasunillu takutitsisinnaanera pitsaanerulluni. Naatsumik oqaatigalugu fjernsynit ullutsinni anginerusut pitsaanerusumik assitaqalerput, tele allappoq.
Teknikkikkut siuariarneq Tele-Postip, KNR-ip Naalakkersuisullu suleqatigiinnerisigut pivoq, tamannalu Tele-Postimi teknikerinut annertuumik suliaqartitsisimavoq:
Pisortaq tulluussimaartoq
- Nunarujussuarmi silarluttaqisumi innuttaasut, imminnut ungasissuni najugaqartut, tamakkerlugit atassuserniarlugit aningaasaliinerit qaqqanilu teknikkikkut iluarsiissutit immikkut ittut atorfissaqartinneqarput.
- Taamaattumik sulisutta tamanna isumannaarsimammassuk, pilersaarutillu malillugit ullorsiornissatsinnut naammassisimammassuk, tulluusimaarutigaarput – tamanna pisinnaasimavoq Naalakkersuisut KNR-illu suleqatigilluarnerisigut, Tele-Postimi pisortaq Kristian Reinert Davidsen oqarpoq.
Kanallit manna HD-mik aallakaatitsisalernerannut pissutaavoq, 2009-mi digitalimik TV Kalaallit Nunaanni atuutsinneqalermat sulisussatigut amigaateqarsimaneq:
- 2009-mi Kalaallit Nunaanni digitalimik TV atulersinneqarpoq. Taamanikkut HD-mut nuussimasuugutta nuna tamakkerluni nunatsinneersunik marlunnik DR-imeersunillu pingasunik kanaaleqarsimassanngikkaluarpoq, Tele-Post allappoq.