Skip to main content

KNR arlalitsigut unammilligassaqartoq

KNR atuisut tusagassiivinnik nutaanik atuilersimanerannik aamma illuni attartukkani tv-kkut aallakaatitassiortarfiusuni oqoqarneranik unammilligassaqartoq, innuttaasunik kiffartuussiviup 2019-imut nalunaarusiaani saqqummiunneqaqqamersumi tamanna atuarneqarsinnaavoq.

KNR-ip kiffartuussinissamik Namminersorlutik Oqartusanut isumaqatigiissutimini pisussaaffini nammassisimavai, pisortaq Karl-Henrik Simornsen innuttaasunik kiffartuussiviup 2019-imut nalunaarusiaani erseqqissaatigaa, siunissarli ernummatiginerarpaa.

- 2019-imi misilissimavarput 2018-imi nammineq Radio-mi – Tv-imilu aallakaatitassiatta qaffanneri aalajangiusimaannarniarlugit. Kisianni akissarsiat qaffakkiartorneri ataatsimoortikkaanni KNR-illu tapiissutisiarisartagai eqqaassagaanni, ukiuni aggersuni, annertuumik sulisariaqarpugut Innuttaasunik Sullissinermi isumaqatigiissummi akunnerit piumasaqaataasut aalajangiusimaannarniarlugit. Taamaattumik pingaaruteqarpoq uparuassallugu, aningaasaqarniarneq iluarsineqanngippat taava KNR-ip aallakaatitassiami aalajangiusimaniarneri aamma ineriartortinniarneri ajornartorsiutigisinnaavai, pisortaq aallaqqaasiummi allappoq, erseqqissaatigaluguli isiginnaartartut tusarnaartartullu piumasaqaataat naammassiniarlugit KNR-imut suli pingaaruteqartoq ineriartornermut malinnaasinnaanissaq aamma tusagassiutitigut atortut nutaat nukittorsarneqarnissaat.

Tusagassiorfinnik atuineq allanngoriartortoq

Kalaallit Nunaanni tusagassiorfinnik atuineq allanngoriartortoq erseqqissaatigineqarpoq.

- Tusarnaartartut isiginnaartartullu annertunerujartuinnartumik internettimiit aamma aallerluni sullissinerit atoraluttuinnaraat taamaasilluni pisarneq malillugu Innuttaasunik Sullissisutut aallakaatitsiviit unammillerneqarput, Karl-Henrik Simonsen ilisimatitsivoq.

Pingaartumik tv-kkut aallakaatitassiassanik suliaqarneq 2019-imi unammillernarsimavoq, ukiut pingasut affaatalu ingerlanerani KNR-ip Tv-iata illorsuaa matuneqartariaqartarsimammat. Tassa ukiut pingasut affaatalu ingerlanerani illorsuaq sisamariarluni matuneqartariaqarsimavoq oqoqarnera pissutigalugu.

2019-imi folketingimut qinersisoqarnera aallakaatitassiarineqarsimaqaaq, tamannalu pissutaavoq tv-kkut radiokkullu aallakaatitassiornermi kiffartuussinissamik isumaqatigiissummik nammassinninnermut.

Nalunaarusiatigut erseqqissaaffigineqarpoq, tusagssiorfik Web-firstip periusissiaanik suli malinnittoq, tassa nutaarsiassat internetsikkut saqqummiuteqqaariarlugit radiokkut tv-kkullu tusarliuttarlugit ingerlatsivoq.

Online-fremgang

Nalunaarusiami atuarneqarsinnaavoq, internetsikkut tusagassiiviup knr.gl-ip ”nukittuumik aamma pitsaasumik ineriartornera ingerlasoq”,  aamma aatsaat siullerpaamik 2019-imi ataasiartumik atuisut millionit qaangersimagaat,  2019-imilu quppernernik atuartartut 11,9 millioniusimasut. Tusagassiorfiup Sermitsiaq.AG-p ilisimatitsissutigaa, 2019-imi internetsikkut tusagassiivimmik 1,6 millionit ataasiartumik atuisimasut, 26 millionillu quppernernik atuartarsimasut.

KBNR aamma 2019-imi iluarinninnermik misissuisimavoq. Tassani takuneqarsinnaavoq, Misissuisinerup takutippaa radioaviisi aamma Qanorooq ullormut imaluunniit ullut tamangajaasa innuttaasut 80 procentiinit malinnaavigineqartartut. 70 procentinik amerlanerusut annertuumik iluarinnittuusut, KNR-llu nittartagaanik atuisut 78 procentiisa imarisai tassani iluarisimaaraat, nalunaarusiami allassimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER