KNQK: Qimussertarnermut aningaasanik amerlanerusunik pissarsisarusuttoq
Qimussertarneq attatiinnarsinnaaqqullugu aningaasanut inatsimmit KNQK qimussertartullu amerlanerusunik aningaasaliiffigineqartariaqarput. KNQK-mit Inatsisartuni ataatsimiititaliaq oqaloqatigineqarusuppoq.
Kalaallit Nunaanni Qimussersartut Kattuffiat KNQK sapaatip akunnerani kingullermi ataatsimeersuarpoq. Ataatsimeersuarnermi Mikkel Jeremiassen siulittaasutut toqqagaavoq.
KNQK-mi ilaasortat siulersuinngortullu nutaat nunami qimussertarnerup attatsiinanrneqarnissaa ineriartortinneqarnissaalu soqutigisarilluinnarpaat.
Qimussertarnerlu attatiinnarniarlugu aningaasanut inatsit aqqutigalugu qimussertarnermut aningaasanik amerlanerusunik aningaasaliissuteqartoqartariaqartoq, KNQK-mi siulersuisunngorlaat isumaqarput. KNQK ukiumut arlaleriarluni qimussimik sukkaniutsitsisarpoq.
- KNQK ukiumut arlaleriarluni suliniuteqartarpoq. Aningaasaliissutaasartullu aningaasanut inatsit aqqutigalugu pissarsiarisartakkavut suliniutigisartakkatsinnut naammanngilluinnarput. Kissaatigaarput ataatsimoortumik aningaasaliissutitut ukiut tamaasa annertunerusunik aningaasaliiffigineqartarnissarput, nammineq aqussinnaasatsinnik, Mikkel Jeremiassen KNQK-mi siulittaasunngorlaaq oqarpoq.
2022-mut aningaasanut inatsisissatut siunnersuut naapertorlugu qimussimik sukkaniutsitsisoqarnissaanut 750.000 koruunit immikkoortinneqarsimapput, ukiunullu pingasunut tulliuttunut 800.000 koruunit immikkoortinneqarsimallutik.
- Qimussimik sukkaniutsitsinissamut amerlanerusunik aningaasaliissuteqartuuppat, KNQK-p qimussertarnermik attassiinnarniarluni ineriartortitsiniarlunilu suliaqarnini ingerlatiinnarsinnaavaa, taamalu qimussertarneq siunissamut isumannaarinniffigalugu, siulittaasoq oqarpoq.
Nuna tamakkerlugu sukkaniuttarnerit ikilisinneqarsimasut
KNQK-mit siusinnerusukkut aalajangiunneqarsimavoq, ukiut pingasukkuutaarlugit nuna tamakkerlugu qimussimik sukkaniutsitsisoqartassasoq, qimussertartuni tamanit peqataaffigineqarsinnaasumik. Kingullermik sukkaniuttoqarnissaanut 1,5 millioner koruunit katersorneqarsimapput. Taakkuli naammaqqajarsimanngillat.
- Suliarisartakkavut ataqatigiissinniarlugit ukiut tamaasa aningaasaqarnitsinnut atatillugu sorsuuteqartariaqartarnerput eqqortuusinnaanngilaq. Nuna tamakkerlugu qimussimik sukkaniutsitsinissamut 800.000 koruunit immikkoortinneqarsimasut naammanngilluinnarput, Mikkel Jeremiassen oqarpoq. Siunertamut aningaasat qanoq amerlatigisut naapertuunnersut oqaatigiumanngilaa.
Ataatsimeeqatigiserinnittoq
KNQK meeqqat qimussimik sukkaniutsinnissaannut aamma Pituffimmi, Avannaani Tunumilu qimussimik sukkaniutsitsinissamut tipsernermit lottornermillu aningaasanik qinnuteqarsinnaavoq.
Siulersuisulli aningaasaqarnikkut siunissami patajaannerusumik atugaqalernissaq anguniarlugu Inatsisartuni aalisarnermut piniarnermullu ataatsimiititaliaq ataatsimeeqatiginissaa piumasarisimavaat.