KNI: Suliassamik naammassinnilluarneq?

KNI sapaatip akunnerata tulliani ataatsimeersuarpat kusanaatsuliornerujussuit kingunerannik ataatsimeersuarnerussaaq, maannakkulli aaqqissuisoqarnikuuvoqq, siulersuini siulittaasoq oqarpoq. Ukioq ataasiinnaq siulersuisunut siulittaasooreerluni tunuarniarluni oqarpoq.

Naatsorsuutit allanngortitikkat. Uninngasuutit nalinginik allanngortiterineq. Kinguaasiuutitigut innarliinerit. Suliffeqarfimmi pigisami Neqimi amigartoorutit millionit arlallit. Peqquserlunneq suliunnaarsitsinerillu. Tamakkua amerlaqaat, KNI-milu kusanaatsuliornerit suliffeqarfik siorna naleqanngitsumik aqutsinermi ajornartoortippaat, tamakkulu siulersuisut siulittaasuata qullersallu tunuarnerannik kinguneqarput.

Aviisi AG taama allappoq.

Pissutsilli maannakkut iluarsipput. Taamatut oqarpoq Svend Hardenberg, aktiaatileqatigiiffimmi pisortanit pigineqartumi Lars Borris Pedersenimik oktobarimi 2021 ataatsimeersuarnermi siulittaasutut paarlaasoq tassa ukioq ataaseq qaangiutinngitsoq.

- Ajornakusoortumik pisariusimillu suliakkerneqarpunga, maannakkulli iluarsaassisoqareerpoq; aammalumi ajunnginnerusumik angusaqarluta, taamaammat suliassara naammassivara, Svend Hardenberg AG-mut oqarpoq. Pingasunngorpat ullo 10. aggusti ileqquusumik ataatsimeersuartoqareertinnagu annertunerusumik oqaaseqarusunngilaq.

Iluarsaassisoqarsimasoq oqarputit. Iluarsaassinermut atatillugu sunik suliaqartoqarnikuua?

- Oqaaseqaatissaqanngilanga. Ataatsimeersuarnermut nalunaarutinni tamakku takuneqarsinnaassapput

Millionilikkaanik kusanaatsuliorneq

Svend Hardenbergimut KNI-mi siulersuisut siulittaasuattut nutaatut suliakkiutaasoq tassaavoq niunernermi suliffeqarfissuarmi ukiuni arlalinni naatsorsuutitigut annertuumik allanngortiterinermik tamakkiisumik qulaajaanissaq. Tassunga ilanngunneqassaaq pisortaanerusimasumut, Peter Grønvold Samuelsenimut, pinaasertunut arneriniartarsimasutut unnerluunneqartumut taartissamik nassaarniarnissaq.

Suliffeqarfimmi aqutseriaatsip ajorluinnartup ataatsimut kinguneraa oktobarimi 2021-mi ataatsimeersuarnermi suliffeqarfissuup naatsorsuutai 2,5 milliarder koruuninik kaaviiaartitaqarnerup kingorna 6,9 miliioner koruuninik amlgartoorfiusup saqqummiunneqarnera, tassa uninngasuutit nalingi appartinneqartariaqarnikuummata suliffeqarfiulllu aningaasaqarnermi inissisimanera eqqortumik takussuserniarlugu nalikilliinerit naqqinneqartariaqarmata.

Aviisimi AG-mi atuarnerusinnaavutit. Aviisi uani pissarsiariuk:

Powered by Labrador CMS