KNI: Kinguaassiuutitigut kanngutaatsuliorfigineqarsimasut taarsiiffigineqassanngillat
KNI-mi sulisut ingerlatseqatigiiffimmi pisortaanerusimasumit Peter Grønvold Samuelsenimit kannguttaatsuliorfigineqarsimasut taarsiiffigineqarnissartik naatsorsuutigissanngilaat.
KNI-p allaffeqarfiani maanna sulisuusut pisortaanerusimasumit Peter Grønvold Samuelsenimit kannguttaatsuliorfigineqarsimasut ingerlatseqatigiiffimmit ikiorserneqarsimapput, aningaasatigulli taarsiiffigineqassanngillat.
-Taarsiissuteqarnissamik pilersaaruteqanngilagut, KNI-mi pisortaaneq Jeppe Jensen Sermitisaq.AG-mut oqarpoq.
Danmarkimi suliffeqarfimmi Danbredimit arnat pingasut kannguttaatsuliorfigineqarsimasut 25.000 aamma 50.000 koruunit akornanni taarsiiffigineqarsimapput, pisortaanerup ilaatigut killissani qaangerlugu pineqartut timaatigut attuualaartarsimagamigit, Jylland-Posten ataasinngornermi allappoq. Arnaq alla ajornerusumik pineqartarsimasoq suliffeqarfimmit 700.000 koruuninik taarsiiffigineqarsimavoq.
Aviisimit aamma Anette Borchorstimit aamma Lise Rolandsen Agustinimit oqaluttuarineqarpoq, 1980-ikkunniit 2017 tikillugu ilisimatusarluni suliniuteqarnermi kinguaassiuutitigut kannguttaatsuliortarsimaneq pillugu inuinnaat saqitsaaffiiattut suliaqartoqarsimasoq. Tassani tusagassiortut paasisimavaat agguaqatigiissillugu 26.000 koruuninik taarsiissuteqartoqartarsimasoq. Taarsiissutaasartartullu taamanerniilli qaffassimasut, ilanngutassiami erseqqissaassutigineqarpoq.
Sulisuusimasut kannguttaatsuliorfigineqarsimanerannut ikiorsiissuteqarnissamik neqerooruteqarsimavisi?
- Naamik, neqerooruteqarsimanngilagut. Pineqartulli attavigisinnaavaatigut, uagullu taakku ikiorserneqarsinnaanersut misissussavarput, Jeppe Jensen ilisimatitsivoq.
Kukkunersiuisarfiup PwC-p naatsorsuutinik peqquserluuteqartoqartarsimaneranik misissuisimasup eqqartuussissuserisoqarfik Bech-Bruun suleqatigalugu kannguttaatsuliortoqartarsimaneranik unnerluussutaasimasorpassuit misissuiffigisimavai.
Pisortaanerusimasoq politiinut unnerluutigineqarsimasoq
KNI-mit erseqqissaassutigineqarpoq, siulersuisunit pingaartinneqarsimasoq, kannguttaatsuliortoqartarsimaneranik misissuinermi, pisimasut taakku inatsisitigut nalilersuinissamut toqqissisimanartumik tunngaveqarnissaq.
Sulisuusimasut maannalu sulisuusut martsip qaammataani aalajangersimavaat, Peter Grønvold Samuelsen politiinut unnerluutiginiarlugu, unnerluussisussaatitaasullu ikioq manna septembarip qaammataani aalajangersimapput pisortaanerusimasoq unnerluutigineqassasoq. KNI-mi aqutsisut politiit misissuineranni attavigineqarsimanngillat.
Jeppe Jensenip Sermitsiaq.AG-mut ilisimatitsissutigaa, suliap malitsigisaanik KNI-mi pissuserissaarnissamut nutaanik malittarisassanik atuutsitsisoqalersimasoq, soorlu aamma uumisaarisarnermut nutaamik politikkiliortoqarsimasoq. Taakkua saniatigut paasissutissiissummik videoliortoqarsimavoq, aqutsisut Sulisoqarnermullu Immikkoortortami sulisut pikkorissarneqarsimapput kiisalu sulisut uumisaarneqartartut uumisaarneqarnermi qanoq iliuuseqarsinnaanermik sungiusarneqarsimapput. Aamma ingerlatseqatigiiffimmi whistleblowerimik aaqqissuussat nutarterlugulu pitsaanerulersinneqarsimavoq.