KNI: Kanngunartuliat ilinniutigissavavut digitalimillu atuinerusoqarnissaa ukkataralugu

KNI-mi pisortap nutaap ukioq qaangiuttoq 2022-milu suliffeqarfimmut naatsorsuutigineqartut misissorpai. Ilaatigut naatsorsuutitigut tukattumik ingerlatsisoqarsimanera kinguaassiuutitigullu kannguttaatsuliortoqartarsimanera pillugit suliat naammassineqassapput, KNI-lu digitalip nalaani inuunermut peqataatinneqalerluni.

Ukiumi 2021-mi suliat ajortut arlallit KNI-mut sunniuteqarsimapput, soorlu naatsorsuutitigut tukattumik ingerlatsisimaneq aamma pisortaasimasup kinguaassiuutitigut kannguttaatsuliorsimasutut unnerluussaanera.

Jeppe Jensen

Pisortatut atorfinillaap Jeppe Jensenip, Peter Grønvold Samuelsen ukioq manna siusinnerusukkut, sulisuusimasut marluk kinguaassiuutitigut kannguttaatsuliorsimasutut politiinut unnerluussisimanera suli saqqummiunneqanngitsoq, atorfimminit soraarniarluni aalajangersimasoq aggustip aallartinnerani taarserpaa.

Tamanna suliffeqarfiullu naatsorsuutai pillugit suliaq ukiumi qaangiutilersumi sammineqarsimaqaat.

- Qularutissaanngilaq ukiup ingerlanerani kannguttaatsuliortarsimanerit naatsorsuutinilu pissusissaanngitsumik iliortoqartarsimanera pillugit suliat KNI-mi pisuni ilungersunarnerpaasimasut, taakku KNI-p iluani minnerunngitsumillu tusagassiorfitsigut sammineqarsimaqaat. Suliat annertuut oqimaattullu KNI-mut Kalaallillu Nunaanni inuiaqatigiinnut sunniuteqartut - tamanna ilisimaareqqissaarparput, Jeppe Jensen Sermitsiaq.AG-mut oqaluttuarpoq.

Suliat siumut isigisumik atorneqassasut

Taassuma erseqqissaassutigaa, suliat suli annertuumik ukkatarineqartut.

- Suliat KNI-mut ajoqusiigaluaqisut, taamaattoq ingerlatseqatigiiffimmi ilannguiniarluta aallartissimasatsinnut pingaaruteqarluarput. Suliat tigussaamik atussavavut KNI-milu pitsanngorsaanermut tunngavittut atorneqassallutik. Pisimasut ilinniutigissavavut, pisortaq oqarpoq.

Ukiup nutaap aallartinnera, suliarpassuit suliffeqarfiullu unammilligassarpassuit aqqusaarsimasaasa iluarsaanneqarnerannut atorneqassaaq.

- Naatsorsuutigara qanittumi pisimasut kingumut qiviarlugit oqarsinnaalissalluta, sulit erseqqissumik qulaajaaffigineqarsimasut pitsaanerpaamillu naammassineqarsimasut.

Sulinermi avatangiisit sulissutigineqassasut

Suliffeqarfik aamma siumut isigaluni ingerlanneqassaaq. Jeppe Jensenip oqaluttuaraa, suliffeqarfimmi sulinermi avatangiisit, isigineqarneq nittarsaassisarnerlu allanngortinniarlugit tamaviaarluni sulisoqassasoq.

- Allannguiniarluni sulineq ukioq manna aallartippoq, 2022-milu annertusarneqassalluni. Sulinermi avatangiisit toqqissisimanartut ingerlatsilluarfiusullu pilersikkutsigit, sulisuvut suliaqarnissamut, akisussaaffimmik tigusinissamut anguniagaqarusussuseqarnissamullu nukissaqarnerulissapput.

Pisortaq naapertorlugu, tamatuma ilaatigut, sulisut piffissaq ungasinnerusoq eqqarsaatigalugu suliffeqarfimmik nukittorsaasinnaasut, sulisoriinnarneqarnissaannut ikiuutaallunilu tassani sulerusussuseqalersitsissasoq.

Digitalikkut ineriartortitsineq

Suliffeqarfimmi suliat ajortut naammassineqarnerisa saniatigut, suliffeqarfiup digitalikkut atortui ukiumi nutaami ineriartortillugit sulisoqassaaq.

- KNI-mut tunngassuteqartut nittartakkat aqqutigalugit ilisimalersimassakka pisortatullu ukiup affaani sulisimaninni ilisimalersimasakka, soorlulusooq ingerlatseqatigiiffiit marluk assigiinngitsut. Internetsimut attaveqarnissamut atortut KNI ingerlatseqatigiiffittut ineriartornermini unittoorsimasutut takutippaat. Taamaattoqanngilarli, asserlut tamanna allanngortissavarput - taamaaliussaguttali digitalikkut periarfissanut atorluarnerusariaqarpavut.

Suliffeqarfimmi ukkatarineqartoq alla tassaavoq silap pissusaa. Tassunga atatillugu suliffeqarfik marlunnik ingerlataqarpoq, appaani KNIP illuutaani, nillataartitsiviini kiassaateqarfiinilu tamani nukimmik atorluaanerunissaq sulissutigineqarluni. Aappaani pisiniarfinni plastikkinik annikillisaaneq suliassutigineqarpoq.

- Silap pissusaanut ajoquusiisartunik nammineq atuinitta annikillisarneqarnerata saniatigut. plastikkinik pinngortitamut mingutsitsinermi akisussaaffeqarnerput aamma isummerfigisimavarput. Uuliat tanngutaasartarllu amerlaqisut tunisarpavut, nalunngilarpullu taakku ilarpassui pinngortitamut qimaannarneqartartut. Taamaammat martsip qaammataani nunami tamarmi paasititsiniaaneq ingerlassimavarput. Tunisassiat texaco-t Polaroil Pilersuisorlu aqqutigalugit tunisartakkatta pinngortitamut qimaannarneqarnissaat pinngitsoortinniarlugu, dunkinik utertitsinermi 3 koruuninik akiliuteqartalerpugut.

Powered by Labrador CMS