KNI ukiumi sulisutsialannik toqqaavoq

KNI-p Sisimiuni Kiffartuussiaviani sulisut tamakkerlugit tallimanngormat aggersarneqarput. Naapeqatigiinnerulli siunertaa naapeqatigiinnissaq sioqqullugu isertuunneqarpoq.

Sulisut pingasut, Tage Lindegaard, Aage Hans Olsen (Ernipajuk) aamma Per Jensen, ukiumi sulisutsialattut toqqarneqarput.

- Eqqarsarpunga ilaanni immaqa oqaaseqanngikkaluarluta suleqatigut ilaat sulingaaramik sinittaraluarnersut apererusuttarluta. Imaluunniit assaa, suleqatipajuga pikkorik, sullarik; assaa suleqatipajuga KNI-mut tunniussaqarsuaarpoq, pisortaaneq Peter Grønvold Samuelsen oqalugiarnermini oqarpoq.

- Ernipajuk 1970-imi KGH-toqqami maani Sisimiuni ilinniartunngorsimavoq. Taamanikkut pisartut ilamininngui oqaluttuaringai tusalaarnikuuakka, ilaatigut Sisimiormiutoqqat ilinniarfigalugillu ilinniartitsisorisimagai.

- KGH pisoqaq angumerilluarpaa, ukiunilu KGH-mi KNI-milu suliffimmik aaqqissuusseqqinnerpassuit aqqusaarsimavai peqataaffigisimallugillu. Sineriammi Niuertutut atorfeqartarsimavoq, ilaquttanilu nuuttarsimapput, qitiusumillu allaffeqarfimmi assigiinngitsunik qaffasissumik akisussaaffeqartuarsimavoq.

- Suliffimminut ataqqinnittuuvoq, suliffimminut tunniusimasuuvoq, suliffimminut tunniussaqarusuttuuvoq, ineriartortitseqataavoq, suli maannamut.

Per Jensen KNI-mi naatsorsuuserinermi naalagaavoq.

- Ullaakkut tamatta sioqqulluta suliartortarpoq, kingullerpaanullu ilaalluni allaffik qimattarpaa. Soraareeraluaraangamiluunniit, mailikkut attaveqartuartarnera najoqqutaralugu nalunarneq ajorpoq angerlarsimaffimminiit, amerlasuutigut unnuarsuarmut, allaammi unnuap qeqqa qaangerlugu suliuartartuusoq.

- Tupigusuutigisarpara inuup taassuma qanoq suliaminik pitsaanerpaamik naammassinninniarluni naammagittartigisinnaanera.

Polaroilimi teknisk chefi, Tage Lindegaard naapeqatigiinnermi peqataasinnaasimanngilaq.

- Tupinnartarpoq Tagep qanoq nammataqarsinnaatigisarnera, suliffimminut qanoq tunniusimatiginera Polaroilimut KNI-mullu qanoq ilumoortigisuunera. Angeqaaq. Taamaattumik Tage, qujanarsuaq.