KNI

KNI sinneqartoornini pitsanngoriartippaa - isornartorsiorneqarlunilu

KNI A/S 62,3 million koruuninik akileraarutinik suli ilanngaatigisaqarnani sinneqartoorpoq

KNI A/S-ip sinneqartoorutini pitsanngoriartippaa

Suliffeqarfissuaq KNI A/S akileraarutit peereerlugit naatsorsuutini angusat katillugit 42,3 million koruuninik sinneqartoorpoq, ukiumi naatsorsuuteqarfiusumi 2012/13-imi 34,7 million koruuniusimallutik. Taamaakkaluartorli Naalakkersuisut ernumassuteqarput.

KNI A/S-imi nalinginnaasumik ataatsimeersuartoqarpoq marlunngornermi aggustip aqqaneq aappaanni.

Ingerlatseqatigiiffiup pitsaanerusumik angusaqarnera aningaasartuutinik sipaaruteqarnissap sammineqarneratigut, periusissiatut suliniutip "KNI 2016-ip tungaanut" piviusunngortinneqarnerata nanginneqarneratigut, kiisalu ingerlatseqatigiiffiup peqqumaasivimmiittunik nalikilliliinernik annikillisarujussuarneratigut iluarsineratigullu pivoq, Naalakkersuisut tusagassiutinut nalunaaruteqarput.

Akiitsut qaffakkiartortut
KNI-p siunissami akiitsunik appaanissamik pingaartitsinissaa Naalakkersuisunit kissaatigineqarpoq tamannami Naalakkersuisut ingerlatseqatigiiffinni Namminersorlutik Oqartussanit pigineqartuni ukkatarisorujussuummassuk. Naalakkersuisut siulittaasuat Aleqa Hammond ataatsimeersuarnermi peqataavoq.

- KNI-p siunissami akiitsunik appaanissamik pingaartitsinissaa Naalakkersuisunit kissaatigineqarpoq tamannami Naalakkersuisut ingerlatseqatigiiffinni Namminersorlutik Oqartussanit pigineqartuni ukkatarisorujussuummassuk, Naalakkersuisut nalunaarput.

Naalakkersuisunit KNI qinnuigineqarpoq ilaatigut Pilersuisup Polaroilillu avissaartinneqarnissaat kaammattuutigineqarsinnaanersoq pillugu misissueqqissaarnermik kaammattuummillu imaqartussamik ingerlatseqatigiiffimmut piginnittuunermut periusissiassamut kaammattuusioqqullugu.Kaammattuutit taakku 2015-imi januaarimi saqqummiunneqarnissaat Naalakkersuisut qilanaaraat.

KNI A/S annertuumik aqutsisutigut siulersuisutigullu ukiumi kingullermi qaangiuttumi taarseraaffiuvoq.

Powered by Labrador CMS