KNI pingajussaanik misissuititsilersoq

KNI-mi innimiilliortoqartarsimasinnaaneranik kiisalu akuersaarneqarsinnaanngitsunik
pissusilersortoqartarsimasinnaaneranik pasitsaassaqarnermi nalunaarutiginninnissamut KNI-mi periutsit pillugit eqqartuussissuserisut avataaneersut ingerlatassaannik misissuisitsoqarnissaa KNI-mi siulersuisut aalajangiuppaat, KNI tallimanngormat tusagassiorfinnut nalunaaruteqarluni ilisimatitsivoq.

KNI-mi politikkerineqartut suliffiullu iluani najoqqutassat, sulinermi pitsaasumik
atugassaqartitsinissamik qulakkeerinnittussaasut, misissuinermi misissuiffigilluarneqassasut, ilisimatitsissutigineqarpoq.

Kukkunersiuisarfik PwC pissutsinik marlunnik misissuilluini ingerlatsereerpoq, taakkuni pisortaanerusimasup Peter Grønvoldip kinguaassiuutitigut inniminniilliorsimanerangaanera kiisalu ingerlatseqatigiiffiup uninngasuutaasa nalinginik naatsorsuinermi eqqunngitsuliortoqarsimanersoq misissorneqarpoq. Pissutsit taakku marluk politiinut unnerluutigineqarsimapput.

Misissuineq kingulleq pingajuusorlu eqqartuussissuseriffimmit Bech Bruunimit ingerlanneqassaaq. Ilaatigut KNI-mi Whistleblower-imik aaqqissuussisimanerup qanoq pitsaatiginera atorluarsinnaatigineralu aamma ilumut innimiilliortoqartarsimanersoq misissorneqassallutik.

Tigussaasumik suliniuteqartoqassasoq

Taamatullu misissuinermi tunngavissarsisoqassappat siulersuisunut innersuussisoqassaaq siunnersuuteqartoqarlunilu. KNI-p siulersuisuini siulittaasoq Lars Borris Pedersen tusagassiorfinnut nalunaaruteqarluni allappoq, KNI suliffigalugu toqqissisimanartuussaaq – tamanna assortorneqarsinnaanngilaq.

- Innimiilliornernut tunngatillugu suliassanik ingerlatseriaatsivut kiisalu sulinermi avatangiisit pitsaasuunissaannut qulakkeerinninnissarput maannakkut misissuiffigillualerparput kiisalu arlaannaannulluunniit attuumassuteqanngitsumik nalunaarutiginnissinnaanermut periutsip atukkatta siunertaminut ajunngitsumik atorsinnaanera aamma misissorniarlutigu. Qaffasinnerusumik qaffasinnginnerusumilluunniit atorfeqaraanni KNI-mi sulineq toqqissisimanartuusussaavoq – tamanna uagutsinnut pingaarnersaavoq, taanna oqarpoq.

Siulersuisunit neriuutigineqarpoq, aasaaneranilu sulinngiffeqarnerup
aallartinneqannginnerani misissuineq naammasineqarsimassasoq, tamatumalu kingorna suliniutaajumaartussanut aalajangiisoqassasoq.

Misissuisoqarnerata nalaani KNI-mi siulersuisut allanik oqaasissaqanngitsut, oqaatigineqarpoq.