KNI pillugu mamianartuliaq annertusigaluttuinnarpoq

KNI-mi mamianartuliaq toqqortaatit naliginut tunngassuteqartumi naatsorsuutinik piaaraluni allannguisimanermut tunngassuteqaannanngilaq. Kukkunersiuinermut suliaqartut PwC-p misissuineranit unnerluutit sakkortuut allat aamma ilanngunneqarput.

Sermitsiaq.AG-p paasivaa kukkunersiunermik suliaqartut PwC december 2020-mi misissueqqissaartussanngortitaanerminnikt peqquserlunnermut tunngassuteqartunik allanik paasisaqarsimasut.

Quersuarmiitinneqartut naliginik naleqarnerulersitsinikkut, ukiumoortumik naatsorsuutit kusassarneqarsimasut kisimiinngitsut PwC-p uppernarsarniartussaasimavai. PwC-p kinaassutsimik isertuussilluni nalunaartoqarnerata kingorna ilanngullugu misissorsimavaa KNI-p allattoqarfiani sulisut ilaat ukiuni arlalinni kingullerni milliuunilikkuutaanik imminut iluanaartissinnaasimasoq.

Paasissutissat kinaassutsimik isertuussilluni nalunaaruteqartumit pineqartut ima tutsuiginartigaat, paasineqarsinnaalluni KNI-mi sulisup Peter Grønvold Samuelsenip pisortanngunnginnerani pisortaaneratalu nalaani namminersorlutik oqartussat ataanni suliffeqarfimmik ilisimasaqarluartuunera takuneqarsinnaalluni.

Unnerluussutit sakkortuut

Kinaassutsimik isertuussilluni nalunaaruteqartup nassuiaarpaa ukiuni 2011-miit 2013-ip tungaanut kontomik "Brandon Revision"-imik taallugu pilersitsisoqarsimasoq, ukiullu taakku iluani KNI tassunga 6.611.501,65 koruuninik ikisisimasoq. Aningaasat KNI-p allattoqarfiani sulisumut kingorna nuunneqarsimasut, kinaassutsimik isertuussilluni nalunaaruteqartumit unnerluutigineqarput.

Peter Grønvold Samuelsen 2013-imi pisortaaninngortinneqarmat konto "Brandon Revision" matuneqarpoq, taarsiulluguli konto ”K/S Ølbøkshave” pilersinneqarluni. Konto nutaaq atorlugu 2013-miilli qaammatit tamaasa 91.300 koruuninik, siunnersortimut atugassatut taallugit KNI-mi sulisummut nuussisoqartarpoq, nalunaaruteqartumit kinaassutsiminik isertuusserusumit oqaatigineqarpoq.

PwC-p nalunaarutigineqartut ilumut uppernarsarsinnaanerai paasinarsissaaq KNI tallimanngorpat ileqquusumik ataatsimeersualerpat.

Siulersuisuni siulittaasup Lars Borris Pedersen Sermitsiaq.AG-p paasissutissaatai ileqquusummik ataatsimeersuarneq sioqqullugu oqaaseqarfigerusunngilai.

Quersuarmiittut naleqarnerulersinneqartut

KNI A/S-imi mamianartuliaq november 2020-mi saqqummiunneqarpoq kukkunersiuisartut Deloittemeersut naatsorsuuserinnereernerisa kinguneranik suliffeqarfiup nammineq aningaasaatai siulersuisunit 50 milliuunit koruuninik appartinneqartariaqalermata. Tassani nassuiaatigineqarpoq 2010 sioqqullugu ”naatsorsuuserinermi kukkusoqarsimasoq”. Siulersuisuni siulittaasoq Lars Borris Pedersen taama nassuiaateqarpoq, erseqqissarlugulu ”kukkunermi peqquserluttoqarsimanngitsoq aningaasaqarnikkulluunniit equngatitsisoqarsimanngitsoq”.

Taama nalunaartoqareernerani KNI-mi sulisuusimasoq Hans Peter Lynge-Larsen aviisimut Sermitsiamut oqaluttuarpoq suliffeqarfiup quersuaani naleqarnerulersitsineq qanoq ingerlanneqartarsimanersoq. KNI A/S suliami politiinut tunniunneqarpoq.

KNI-mi siulersuisut politiit inerniliinerat utaqqeqqaassallugu decemberimi ilisimatitsipput. Suliffeqarfiulli ingerlanneqarnerata misissorneqarnissaanut torersaassisoqarnissaanullu politikkikkut piumasaqarneq annertuallaalermat, suliamut attuumassuteqanngitsoq, kukkunersiuisarfik. PwC misissuisussanngorlugu suliakkerneqarpoq.

Pisortaq kannguttaatsuliorsimasutut unnerluutigineqartoq

Aningaasaqarnikkut peqquserluttoqarsimanera kisimi KNI-mi oqaluttuassanngilaq.

KNI-mi pisortaaneq Peter Grønvold Samuelsen aprilimi 2021-mi politiinut tunniunneqarpoq, sulisunut kinguaassiuutitigut kannguttaatsuliorsimasutut nalunaarutigineqarluni. Nalunaarutiginnittoqareernerata kingorna politiit aalajangerput suliami unnerluussisoqassasoq, suliarlu eqqartuussivimmi 1. aamma 2. december suliarineqartussanngorpoq.

Powered by Labrador CMS