Skip to main content

KNI piffissaliussamut angumerseqqammilersoq

KNI A/S-imi siulersuisut ataatsimeersuarnissaq ullulersimavaat, tassani suliffeqarfissuup ukiumoortumik nalunaarusiaq saqqummiutissavaa, Inuussutissarsiornermut Aqutsisoqarfiup nalunaarusiamik kingusinnerpaamik tunniussiffissatut ulluliussimasaa angumereqqartussanngorlugu.

KNI A/S tallimanngornermi oktobarip arfineq-pingajuani ataatsimeersuassaaq, tassani ukiumoortumik nalunaarusiaq tamanut saqqummiunneqassalluni.

Naatsorsuusiornermi peqquserluttuliorsimasutut unnerluussisimanerit malitsigisaannik kukkunersiuisartut arlaannaannulluunniit attuumassuteqanngitsut misissuitinneqarsimanerat pissutigalugu KNI A/S nalunaarusiamik saqqummiussinissaminut piffissaalatsisimaqaaq. Ingerlatseqatigiiffiup aningaasaqarnerata sapinngisamik eqqortumik takuneqarsinnaanngortinneqarnissaa anguniarlugu aningaasaqarnermik aaqqissuussisoqarsimavoq.

Kukkunersiuisarfiup PwC-p aningaasaqarnermik qulaajaalluni suliaqarnera annertummat, ukiumoortumik nalunaarusiap tunniunneqarnissaa kinguartinniarlugu aggustip qaammataani Inuussutissarsiornermut Aqutsisoqarfimmut qinnuiginnittoqarsimavoq. Aallaqqaammut pilersaarutit malillugit aggustip aqqarnani ataatsimeersuartoqartussaagaluarpoq.

Inuussutissarsiornermut Aqutsisoqarfiup kingusinnerpaamik ataasinngorneq oktobarip aqqarnat ukiumoortumik nalunaarusiaq tunniunneqarnissaanut piffissaliussimavaa. KNI-mi siulersuisut tallimanngornermi oktobarip arfineq-pingajuaanni ataatsimeersuartoqarnissaanik aalajangernermikkut nalunaarusiamik tunniussinissamut inatsisitigut piumasaqaataasoq maleqqatoorneqartussanngorpoq.

Ukiunoortumik nalunaarusiaq imakinnerusoq

Ukiumoortumilli nalunaarusiaq siusinnerusukkut ukiumoortumik nalunaarusiarineqartartunit allaanerungaatsiassaaq.

Sermitsiaq.AG-p paasisimasai naapertorlugit, suliffeqarfissuup naatsorsuutai kisimik saqqummiunneqassapput. Ingerlatseqatigiiffiup immikkoortortaqarfiinit naatsorsuutitigut paasissutissat ataatsimeersuarnermi ileqquusutut saqqummiunneqartartut saqqummiunneqassanngillat. Taakku ilanngullugit suliarineqarnissaanut piffissaqartoqarsimanngimmat. Ukiumoortumik naatsorsuusiortarnermut inatsimmi aalajangersakkat malillugit, KNI A/S minnerpaamik suliffeqarfissuup naatsorsuutaanik tunniussisussaavoq, taamalu suliffeqarfissuarmit inatst malinneqassalluni.

Namminersorlutik Oqartussat ingerlatseqatigiiffiutaanni suliffeqarfissuup naatsorsuutai paasisaqarfigissallugit soqutigineqarluartarpoq. Apeqquterujussuusormi tassaavoq, 2020-mi novembarip qaammataani nammineq aningaasaatit 50 millioner koruuninik nalikillineqarsimanerat naammannersut.

Taamanikkut siulersuisuni siulittaasuusup Lars Borris Pedersenip 2020-mi uninngasuutinik naatsorsuillunilu nalunaarsuisimaneq nammineq aningaasaatinik nalikilliliinermut tunngaviusimasoq kukkusuunerarpaa.

Taamatut nalunaaruteqarnerup kingunitsiannguatigut KNI-mi sulisuussimasup ingerlatseqatigiiffik ukiuni arlalinni  - aamma 2010-p kingorna - uninngasuutit nalinginik peqquserlulluni annertunerulertitsisartutut unnerluutigaa.

Sermitsiaq.AG-mit paasineqarpoq, kukkunersiuisarfiup PwC-p aningaasaqarnikkut pissutsinik qulaajaanermini aamma peqquserluuteqarsimasutut unnerluussaasimaneq misissorsimagaa, tamannalu siulersuisut siulittaasuata 2020-mi novembarip qaammataani nalunaarutaanut akerliulluinnartoq, siulittaasoq taamanikkut oqarami ”peqquserluuteqartoqarsimanngitsoq imaluunniit kukkussuteqanermi aningaasaqarneq arlaatigut naapertuukkunnaartinneqarsimanngitsoq. Naatsorsuinermi kukkussuteqarsimaneq pineqarmat”. 

Taamatut oqaaseqarsimanera ukiumoortumik nalunaarusiap oktobarip arfineq-aappaani saqqummiunneqarpat eqqortuunersoq paasineqarumaarpoq.

Pisortat arlallit soraarsimasut

Ilungersunartunik unnerluussisoqartareersoq pisortat arlallit KNI A/S-imi suliunnaarsimapput.

Pisortaaneq Peter Grønvold Samuelsen maanna sulisuusut sulisuusimasullu kannguttaatsuliortarsimasutut unnerluutigineqarami ukioq manna apriilip qaammataani suliffimminit tunuarpoq. Suliaq ullualunnguit matuma siornatigut unnerluussinermik nassataqarpoq, tassungalu atatillugu Sisimiut eqqartuussiviani decembarip aallaqqaataani aappaanilu eqqartuussisoqassaaq.

Peter Grønvold Samuelsen pisortani kisartaalluni Namminersorlutik Oqartussat ingerlatseqatigiiffiutaanni suliunnaarsimanngilaq. Naatsorsuuserinermi pisortaq Per Jensen maajip qaammataani soraarsitaavoq, Sulisoqarnermullu immikkoortortami pisortaq Mikol Poulsen ”isumaqatigiissuteqarnikkut” septembarip 15-iani suliunnaarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER