KNI-p timersoqatigiiffimmik tapersersuinini sivitsorpaa

KNI A/S-ip Nagdlúnguak' 48-imut aningaasaliisarnera ukiunik marlunnik sivitsorneqarpoq.

Tamanna KNI-p nittartagaani atuarneqarsinnaavoq.

- Nuannaarutigisorujussuuara suliffeqarfittut Nagdlúnguak’ 48 aningaasaliisarnissamik isumaqatigiissute-qarfigisinnaagatsigu, nalunngilarpummi timersoqatigiiffimmi tassani timersortartut pimoorussinerit pimoorussinnginnerusullu tamarmik inissaqartinneqarlutik annertoorujussuarmik suliniarfigineqartut, meeqqat, inuusuttut, inersimasut utoqqasaallu ilanngullugit. Pitsaaliuineq eqqarsaatigalugu timersoqatigiiffiup meeqqat pillugit suliniarnerat assut tapersersorparput. Taakkumi peqqinnartumik timikkut tarnikkullu nukittuunngornissaat isumagisariaqarpoq, piginnaanerillu taama ittut suliffeqarfitsinni aamma atorfissaqartippagut, KNI-mi pisortaaneq Peter Grønvold Samuelsen oqarpoq.

Torersuutitseqataasut

Ilulissani timersoqatigiiffiup iliuuseqarluartarnera KNI-mit nuannaarutigineqarpoq.

- Minnerunngitsumillu KNI-p aningaasaliineratigut N-48 periarfissaqalernikuuvoq piffissaq katersiniarnernut atugassaagaluaminnut taarsiullugu utoqqaat utoqqaat illuanni najugallit pisuttuaallugit aneertittalernerannut. Suliniutillu taama ittut saniatigut illoqarfiup iluani pinngortitamilu eqqagassanik katersisarput illoqarfimminni torersuutitseqataarusullutik.

N-48 timersuutinik arlanillik ingerlataqarpoq: Isikkamik arsarneq, futsal, assammik arsarneq, nerrivimmi arsaararneq, kiisalu Inuit timersuutaat. Isumaqatigiissut juunimi 2022-ip tungaanut atuutiissaaq.