KNI nutaamik pisortartaalerpoq
Jeppe Jensen KNI-mi pisortanngortussanngorpoq. Taassuma Peter Grønvold Samuelsen, martsip naalernerani pisortatut soraarniuteqartoq, taarsertussanngorpaa.
KNI A/S-imi siulersuisut Jeppe Jensen KNI-mi pisortatut atorfinitsippaat. Jeppe Jensenip Peter Grønvold Samuelsen, martsip naanerani pisortatut soraartoq taarsertussanngorpaa. Peter Grønvold Samuelsen arnat marluk KNI-mi sulisuusimasut tiiganiarfigitissimallutik politiinut unnerluussummik tunniussereersullu tunuarniuteqarluni suliunnaarpoq.
Jeppe Jensen Mittarfeqarfinni pisortaasimavoq, kiisalu Mittarfeqarfinni Tele Greenlandimilu pisortatut sulinermik misilittagaqarluni.
KNI tusagassiorfinnut nalunaaruteqarluni ilisimatitsivoq.
KNI-mi siulersuisuni siulittaasoq Lars Borris Pedersen oqarpoq Jeppe Jensen siulersuisunit toqqarneqarnera iluarisimaarnarluinnartoq. KNI-p ineriartornissaanut pisariaqartitaanik Jeppe Jensen naammassinnissinnaalluartoq, siulersuisuni siulittaasoq oqarpoq:
- Jeppe Nunatsinneersuuvoq aqutsisutut pikkorilluinnartoq, Nunatsinni attaveqarfigilluartakkaminik peqarluarpoq kiisalu pingaarneq tassaalluni Jeppe Nunatsinni inuiaqatigiit pitsaasumik sunniuteqarluarfigerusuttuummagit. Tamannarpiarlu KNI-p ataneranut tunngaviulluinnartuuvoq, Lars Borris Pedersen tusagassiorfinnut nalunaaruteqarnermi oqarpoq.
Pisortaq politiinut tunniunneqarsimasoq taarserpaa
Jeppe Jensen 5. august pisortatut sulilissaaq:
- KNI-mi pisortaaninngornissannut tatigineqarnera assut maniguuffigaara. Nunatsinni attaveqaatitigut atortulersuutitigullu KNI ilaalluinnartuuvoq - suliffeqarfiuvoq Nunatsinnik ataqatigiissitsisuusoq tamattalu arlaatigut attuumassuteqarfigisarput. KNI-mi sulisut pikkorissut peqatigalugit suliffeqarfiup Nunatsinni inuiaqatigiinnut iluaqutaasussamik ineriartortitsinissannut qilanaarpunga, pisortanngortoq oqarpoq.
Peter Grønvold Samuelsen martsip naanerani suliffimminit tunuarniuteqarluni soraarpoq. Pisortap tunuarniuteqarluni nalunaaruteqareernerata Sermitsiaq.AG-p allaaseraa pisortaasimasoq Peter Grønvold Samuelsen tiiganiarluni killissamik qaangiisimasutut KNI-mi sulisuusimasunit politiinut unnerluutigineqarsimasoq.
Sermitsiaq.AG-p majimi aamma allaaseraa pisortaagallartup Jan Lynge Pedersenip KNI-mi sulisut ilisimatissimagai aningaaserinermut pisortaq Per Jensen soraarsitaasoq.