KNI-mi sulisoqarnermut nutaamik pisortaqalersoq
KNI A/S sulisoqarnermut nutaamik pisortartaarsimavoq. Kista Kreutzmann januaarip aallaqqaataa aallarnerfigalugu pisortatut atorfeqalerpoq, suliffeqarfimmilu ukiuni kingullerni kinguaassiuutitigut kannguttaatsuliortoqartarsimanerata naatsorsuutitigullu peqquserluttoqartarsimanerata kingorna, sulinermi avatangiisit pitsaanerulersinniarlugit suliaqarnermi siuttuussalluni.
KNI sulisoqarnermut pisortassamik akunnerminni sulisumik nassaarsimavoq. Kista Kreutzmanna januaarip tungaanut KNI-p aningaasarsialeriffiani pisortaasimasoq pisortanngortinneqarsimavoq. Taanna septembarimili Sulisoqarnermut pisortaagallartinneqarsimavoq.
Pisortaaneq Jeppe Jensen Sulisoqarnermut pisortanngorlaamut tatitiginninnerarpoq.
- Nuannaarpunga Kista sulisoqarnermut pisortaarusulluni akuersisimammat. Kista aqutsisutut pikkorissuuvoq suleqatiminiillu ataqqineqartuuvoq suliaminut ilisimasaqarluarnermigut kinaassutsimigullu. Kistap sulisoqarnermut pisortaagallarnermini, sulissutigisimavaa sulisoqarnermut immikkoortortaqarfiup ammanerunissaa saaffikkuminarnissaalu, Kista sulisoqarnermut immikkoortortaqarfimmut ineriartortitseqqissaaq KNI-mi sulisunut iluaqutaasussamut, pisortaaneq oqarpoq.
Kista Maniitsuminngaanneersuuvoq, sulisoqarnermullu immikkoortortaqarfimmut pitinnani, aningaasaqarnermut atatillugu assigiinngitsutigut ukiorpassuarni suliaqartarsimalluni. Kista KNI-mi ukiuni 20-ni katillugu sulereersimavoq, suliffeqarfiullu immikkoortortaqarfiini aqutsisutut naatsorsuuserivimmi akissarsialerivimmilu atorfeqartarsimavoq kiisalu sulisoqarnermut immikkoortortaqarfimmi tullersortitut.
Taamaakkaluartoq Sulisoqarnermut pisortanngorlaaq suliassaminut maniguuppoq.
- KNI-mi sulisoqarnermut pisortatut toqqagaanera tulluusimaarutigeqaara, suleqatikkalu peqatigalugit sulisoqarnermut immikkoortortaqarfimmi suliassarpassuit aggersut ingerlannissaanik qilanaarpunga, aammalu KNI-p ineriartornissaanut peqataanissannut, Kista Kreutzmann oqarpoq.