KNI-mi sinneqartoorut aatsaat taama annertutigisoq

KNI ukiumi naatsorsuiffiusumi ukiorpassuarni aatsaat taama angusarissaartigaaq

Akileraannginnermi 115,4 millionit koruunit. KNI ukiumi naatsorsuiffiusumi 2018/20019-imi taama iluanaaruteqarpoq.

Angusaq ukiorpassuarni aatsaat taama pitsaatigaaq, suliffeqarfissuullu oqaluttuarisaanerani pitsaanerpaat ilaanniilluni.

- Ukioq naatsorsuuteqarfiusoq kingumut KNI-mut aningaasaqarnikkut patajaallisaanermut atorneqaqqippoq, suliffigissaanermut, pisisartunillu qitiutitsinissamik ”kalaallit inuunerannik ilorlermik” pingaartitsillunilu ataqqinninnermik tunngaveqartumik suliffeqarfimmik ingerlatsinisssamik pingaartitsiffiulluni, pisortaaneq Peter Grønvold Samuelsen tusagassiuutinut nalunaarummi taama oqarpoq.

- Periusissiaq Killingusaaq ukiuni kingullerni marlunni aqqutigalugu suliffeqarfissuup aningaasaqarnera nukittoriartinneqaqqissimavoq, tamatumunngalu peqatigitillugu suliffeqarfissuarmik naleqarnerulersitsineq ataqatiigiissaarneqarluarsimasorlu sulisut akornanni paasitilluarneqarsimalluni.

Aserfallatsaaliuinermi kinguaattoorutit

Akileraareernermi angusat 78 millionit koruuniupput, namminerlu aningaasaatit 1.183 millionit koruuniupput.

Taamaattoq KNI-p aningaasat pisariaqartittorujussuuai. Tassami suliffeqarfissuup aserfallatsaaliornissamut kinguaattorutai katillutik 415 millionit koruuniupput, nioqqutissanik pilersuinerup iluani sanaartukkani 270 millionit koruunit aamma nukissiornerup iluani 145 millionit koruunit.

- Aningaasalersugassat taama annertutigisut isumagineqassappata pisariaqarluinnarpoq KNI-p sinneqartooruteqarluni ingerlanneqarnissaa, aningaasaateqanngikkaan-nimi sanaartortoqarsinnaanngimmat, Peter Grønvold Samuelsen oqarpoq.

- Aserfallatsaaliuineq kisiat aningaasalersorneqartussaanngilaq, aammattaarli nutaaliorneq akissaqartinneqartariaqarluni. Ukiumi qaangiuttumi DKK 154 mio.-it sanaartornermut atorneqarsimapput. Ukiuni aggersuni ukiumut DKK 170 mio.-it sanaartornermut atorneqarnissaat naatsor-suutigineqarpoq.

KNI sinneqartoorutiminit nunap karsianut 20 millionit koruuninik tapiissuteqarpoq. KNI tamatuma saniatigut sulisut akileraarutaat 75 millionit koruunit pisortat karsiinut utertippaat, kiisalu ingerlatseqatigiiffiit akileraarutaat 29 millionit koruunit akilerlugit.

Powered by Labrador CMS