KNI-mi saliisoqarnissaa Naleqqamit piumasarineqartoq
KNI-mii ataasimeersuartoqartinnagu naatsorsuusiornermi tukattumik ingerlatsisarsimanerup maanna misissuiffigineqartup inernerisassaai Naleqqamit utaqqineqarumanngillat. Siulersuisut nutaat taakkuusariaqarput, suliffeqarfiup maanna misissuiffigineqarneranik naliliisussat.
KNI-mi siulersuisut taarserneqartariaqarput, tamannalu maanna pisariaqartoq Naleqqamit isumaqartoqarpoq.
KNI pilersaarutit malillugit aggustip qiteqqunnerani ataatsimeersuarlunilu ukiumoortumik naatsorsuutinik saqqummiussisussaagaluarpoq, inuussutissarsiornermulli aqutsisoqarfimmit naatsorsuutinik kingusinnerpaamik tunniussinissaq oktobarip aqqarnanut kinguartinneqarsimavoq.
Ataatsimeersuarnissaq kinguartinneqarsimavoq, Naalakkersuisut Siulittaasuat Múte Bourup Egede (IA) naapertorlugu, ingerlatseqatigiiffiup aingaasaqarnera pillugu maannakkorpiaq misissuisoqarnera pissutigalugu.
- Naleqqamit isumaqarpugut, Naalakkersuisut ataatsimeersuarnissap kinguartinneqarneranut tunngavilersuutaat aporfiusariaqanngitsut, eqqaamaneqartariaqarpormi naatsorsuutit pissusiviusunik tunngaveqanngitsut piffissami sivitsortumi tusagassiorfitsigut aqqummiunneqartartut, Jens Napaattooq (N) isornartorsiuivoq.
Naatsorsuinerluttarnerit misissorneqartut
KNI-p uninngasuutai ukiut qulit kingulliit ingerlaneranni 50 aamma70 millioner koruunit akornanni eqqunngitsumik naleqartinneqartarsimapput. Tamanna siulersuisut siorna novembarip qaammataani tusagassiorfinnut nalunaarutaanni atuarneqarsinnaavoq.
Naleqqamit suliffeqarfiup pisortartaavata inissinnissamut piffissaqartinneqarnissaa akuersaarneqarpoq, peqatigitilluguli partiimit isumaqarput, naatsorsuusiortarnermi ajornartorsiutaasut misissorneqarnissaat siulersuisut nutaat allaltut isiginnittaasillit suliarisariaqaraat.
- Siulersuisut siulittaasuata kanngunartuliap matuma kingornatigut aqutsisut taarserneqarnissaannik siunniussaqarsimanera pitsaasutut isigaarput. Taamaammat maannakkut ataatsimeersuartoqarnissaa piumasaraarput, siulersuisut aqutsisullu ingerlaannaq taarserneqarniassammata.
Siulittaasoq siulittaasussatut sassaqqinnianngitsoq
Siulersuisut siulittaasuat Lars Borris Pedersen tulliani ataatsimeersuartoqarpat siulittaasussatut sassaqqinnianngilaq.
- Erseqqilluinnartumimmi takuneqarsinnaavoq, siulersuisut kukkussutaasimasunik (naatsorsuutit) taakkunannga soqutigisaqarpasinngitsut. Siulersuisut pissutsinik imminnut attuumassuteqartunik namminnerlu ingerlatsisimanerminnik misissuinissaat politikkikkut akisussaaffigineqarsinnaanngilaq, Napaattooq oqarpoq.
Peter Grønvold Samuelsenip kinguaassiuutitigut kannguttaatsuliorsimasutut sulisuusimasunit politiinut unnerluunneqarsimanerata saqqummiunneqanngitsiarnerani, pineqartoq ukioq manna siusinnerusukkut atorfimminit soraarmat, Jeppe Jensen pisortaanertut nutaatut juulip qaammataani KNI-mit atorfinitsinneqarpoq.
Múte isumaqataasoq
Suliat arlallit taamaalillutik Namminersorlutik Oqartussat suliffeqarfiutaannut tatisisimapput. Naalakkersuisut Siulittaasuata Múte B. Egedep Sermitsiaq.AG-mut erseqqissaassutigaa, Naleraq isumaqatigalugu.
- KNI-mi pisimasoq kusananngilaq. Uninngasuutit, naatsorsuutit sulisunullu atatiallugit suliat piaarnerpaamik paasisaqarfigineqartariaqarput, taanna oqarpoq.
Misissuinerit qaqugu naammassineqassanersut aamma naatsorsuutit qaqugu saqqummiunneqassanersut ilisimaneqanngilaq, Naleqqamiilli siulittaasumut oqaatigineqarsimavoq, suliat sukkanerusumik naammassineqartariaqartut.