KNI-mi pisortaq alla aamma suliunnaartoq
Namminersorlutik Oqartussat ingerlatseqatigiiffiutaat KNI A/S Sulisoqarnermut immikkoortortami pisortassarsioqqittussanngorpoq.
Mikol Poulsen, Polaroilimi sulisimasoq kingusinnerusukkllu KNI-mi Sulisoqarnermut immikkoortortami pisortaasoq septembarip 15-iani suliunnaarsimavoq.
Piortaanerup nutaap Jeppe Jensenip KNI-mi sulisunut mailikkut ilisimatitsissutigisimavaa, ”isumaqatigiissuteqarneq tunngavigalugu” pineqartoq suliunnaarsimasoq.
- Mikol siullermik Polaroilimi kingusinnerusukkullu KNI-mi ukiorpassuarni suliaqarsimaneranut qujaffigerusuppara, Jeppe Jensen KNI-p iluani ilisimatitsissuteqarluni, Sermitsiaq.AG-mit takuneqarsimasumi, allappoq.
Ilisimatitsissummi aamma ilanngullugu paasissutissiissutigineqarpoq, aningaasarsialerivimmi pisortaq Kista Kreutzmann Sulisoqarnermut immikkoortortaqarfimmi pisortassamik nutaamik pissarsisoqarnissaata tungaanut isumaginnittuussasoq.
Arlallit soraarsinneqarsimasut
Mikol Poulsenip sulunnaarnera, aviisip Sermitsiap saqqummiussimasaatut naatsorsuusiornermi peqquserluttoqarsimaneranik unnerluussisimanerup kinguneranik suliunnaartut ilagaat, unnerluussisoqarmat kukkunersiuisarfik PwC KNI A/S-imi pissutsinik itisiliilluni misissuitinneqarsimavoq.
Tamatuma malitsigisaanik pisortaanerusimasoq Peter Grønvold Samuelsen ukioq manna apriilip qaammataani atorfimminit tunuarpoq, taamanikkut sulisut arlallit kannguttaatsuliortarsimasutut politiinut unnerluutigimmassuk.
Tamatuma kingornatigut sapaatip akunnialui qaangiummata naatsorsuusiornermi pisortaq Per Jensen, taamanikkut pisortaagallartumit Jan Lynge Pedersenimut soraarsinneqarpoq.
Sulisoqarnermut pisortaq sooq suliunnaartinneqarnera pillugu mailimi ilisimatitsissutigineqarsimanngilaq.