KNI-mi pisortaasimasoq eqqartuussivimmi ullumi sassartinneqassaaq
KNI-mi pisortaasimasoq Peter Grønvold Samuelsen eqqartuussivimmi ullumi sassartinneqarpoq, kinguaassiuutitigut kannguttaatsuliorsimasutut unnerluunneqarluni. Suliaq 1. aamma 2. december suliarineqartussaasimagaluartoq kinguartinneqarnikuuvoq.
KNI-mi pisortaasimasumut Peter Grønvold Samuelsenimut tunngasut eqqartuussivimmi suliassanngortinneqarsimasut, sulianut assigiinngitsunut tallimaasunut kannguttaatsuliorsimanermut tunngasuusunut, eqqartuussut Qeqqata eqqartuussiviani ullumi nalunaaqutaq 9.00 aallartinneqarput, aqagulu 2. februar nanginneqassallutik.
Eqqartuussivimmi suliassanngortitsineq kinguaattoorsimavoq. Eqqartuussivimmi sassartitsineq ulluni 1. aamma 2. december ingerlanneqartussaasimagaluarput, Nuummili silarlunnera pissutigalugu suliami illersuisoq aamma unnerluussisussaatitaasoq Sisimiunut piffissaq eqqorlugu tikissinnaasimanngimmata kinguartitsisoqartariaqarsimavoq.
Peter Grønvold Samuelsenip illersuisua, Finn Meinel, Sermitsiaq.AG-mut siusinnerusukkut nassuiaateqarpoq Peter Grønvold Samuelsen suliami pinngitsuutinneqarnissaminik piumasaqartoq.
Suliaq naatsumik
Arnat arlallit martsimi 2021-mi aalajangerput Peter Grønvold Samuelsen kinguaassiuutitigut kannguttaatsuliorsimasutut politiinut tunniutissallugu. Arnat politiinut suliassanngortitsisut tamarmik KNI A/S-imi sulisuupput sulisuusimallutilluunniit.
Politiinut nalunaarutiginninnermi suliat tallimat unnerluussutitut ingerlateqqinneqarput.
Martsimi 2020-mi Sermitsiaq.AG-p aamma oqaluttuaraa Peter Grønvold Samuelsen ukiuni arfineq-pingasuni pisortaareerluni ingerlaannartumik soraarniuteqartoq.
