KNI-mi pisortaanerusimasup oqaatsit kusanartut oqaatiginngittuugai

Arnat Peter Grønvold Samuelsenimik kannguttaatsuliorsimasutut politiinut unnerluussisimasut, ukiumi naatsorsuusiorfiusumi 2019/20-mi KNI-mit ukiumut nalunaarusiaq itisilerlugu atuarsimasuugunikku pakatsisimassaqaat.

Ukiumut nalunaarusiaq pisortaanerup ukiumut misilitsiffiatut isigineqarsinnaasoq, siorna kusanartorpassuarnik assitaqarlunilu aatsaat taamak angitigaluni 108-nik qupperneqarpoq Ukiup siuliani ukiumoortumik nalunaarusiaq 79-iinnarnik qupperneqarsimalluni.

Niuernermi tunngaviit nutaaliat

Aap, nittarsaassinermi sipaaruteqartoqarani ilaatigut sulisut sullitallu qungujulasut assitalersuunneqarsimapput. Kingumut qiviarluni innuttaasunut takutinniarneqarpasippoq, KNI A/S aningaasaqarnikkut ingerlalluarlunilu ”niuernermi tunngaviit nutaaliaasut malillugit” ingerlanneqartoq, qupperneq 7-imi taamatut oqaasertaliisoqarsimalluni.

Pingaartumilli qupperneq 73-imi allanneqarsimasut pillugit arnat qulit pisortaanermit timimikkut attuaalaarneqartarlutillu kinguaassiuutinut tunngatillugu oqaatsitigut kannguttaatsuliorfigineqartarsimasut tupassimanissaat ilimanarpoq. Quppernermi pineqartumi qulequtsiunneqarsimasoq ”Sulisunut atugassarititat” maluginiarnartuuvoq:

- KNI Kalaallit Nunaanni suliffeqarfiit annerit ilagaat. Taamaammat pisussaaffigaarput qulakkiissallugit, sulisutta inuillu suleqatigisatta toqqissisimallutik ullormi sulisarnissaat – eqqortunik atortoqarnissaat, ajutooratik suliaminnik isumaginninnissamut sungiusarlutillu ilisimasaqarnissaat. Sulissutigaarput suliffimmi pitsaasumik avatangiiseqarnissaq, sulisuvut ajunngitsumik atugaqartissallugit aamma nuannaarlutik suliartortarnissaat – sullitattalu uagutsinni nuannaarlutik pisiniartarnissaat anguniarlugit.

Sulisuusimaneq inuttut akisoqisoq

Arnalli ilaasa Sisimiuni qullesaqarfimmi pisortaanerup ulluinnarni suliffigisaani sulisuusimanertik inuttut akisunaarsimavaat. Arnat arlallit Peter Grønvold Samuelsenimik kannguttaatsuliorsimasutut kinaassutsiminnik isertorlutik unnerluutiginnissimasut, aamma Sermitsiaq.AG-mit oqaloqatigineqarsimasut oqaluttuaraat tarnip pissusaanik ilisimasalimmut ikiortissarsiortariaqarsimallutik.

Sermitsiaq.AG-mit puigorneqanngisaannassaaq, Peter Grønvold Samuelsenip killissaminik qaangiilluni pissuserisarsimasaanik arnat kinaassutsiminnik isertorlutik 2020-mi februaarip qaammataani oqaluttuaat.

Nalunaaquttap akunnerata affaa qanngiummat arnaq qissaserpoq. KNI-mi pisarsimasut oqaluttuarineri pisortaanerullu oqaatsitigut timikkulu iliuuserisarsimasaanit tarnikkut ikilerneqarsimaneq oqimaappallaarmata.

Anguniarpaali – sulisuusimasut allat assigalugit - pisortaanermik unitsitsinissaq, arnat allat taassuma pissusilersuutaanit ajoquserneqannginniassammata.

Ukiumut 4 mio. koruuningajalluinnarnik aningaasarsisartoq

2021-mi martsip qaammataata aallartinnerani aatsaat Peter Grønvold Samuelseni politiinut unnerluutigissallugu nukissaqalerlunilu sapiissuseqalersimavoq. Tamannalu pimmat pisut sukkasuupilussuarmik ingerlasimapput.

Politiinut unnerluutiginnimmat qaammat ataaseq qaangiutinngitsoq Peter Grønvold Samuelsen - siulersuisuni siulittaasoq Lars Borris Pedersen naapertorlugu - atorfimminit soraarniuteqarsimavoq.

Peter Grønvold Samuelseni soraarniuteqarnermigut ukiumut Kalaallit Nunaanni aningaasarsiat annersaasa ilaannik aningaasarsiaqartarnerminik annaasaqassaaq. 2019/20-mut ukiumut naatsorsuutini atuarneqarsinnaavoq, pisortaaneq ukiup siuliani 3.775.000 koruuninik isertitaqarsimasoq.