Skip to main content

KNI-mi pisortaaneq tiinganiartarnini pillugu politiinut unnerluutigineqarsimasoq

Sermitsiamit paasineqarpoq, sulisuusimasut marluk KNI-mi pisortaaneq Peter Grønvold Samuelsen tiinganiartarsimasutut politiinut unnerluutigisimagaat. Pisortaanerup ataasinngornermi soraarniuteqarneranut tamanna pissutaanersoq siulersuisuni siulittaasup oqaaseqarfigerusunngilaa.

KNI-mi sulisuusimasut marluk martsip pingajuani sisamaanilu, KNI-mi pisortaaneq Peter Grønvold Samuelsen, martsip naanerani aallartittumik soraarniarluni ullumi aalajangersimasoq politiinut unnerluutigisimavaat.

Sisimiuni politiit suliat taakku marluk, KNI-p qullersaqarfiani sulinermullu atatillugu angalasimanerni kannguttaatsuliorsimasutut inississimavaat.

Arnat taakku marluk unnerluutiginnissimasut kinguneqaataasinnaasunik aarleqquteqaramik kikkuunertik isertorlugu nalunaaruteqarsimapput.

Killissamik qaangiilluni iliuuseqartarsimasoq

Arnat takku marluk saniatigut Sermitsiaq.AG-p arnat arlallit ukiup ataatsip ingerlanera sinnerlugu apersortarsimavai, apersorneqartartut oqaatsitigut allakkatigullu oqaluttuarisarpaat, Peter Grønvold Samuelsenip killissani qaangerlugu iliuuseqartarsimanera, tamatumalu malitsigisaanik tarnip pissusaanik ilisimasalimmit arnat arlallit ikiorserneqartariaqartarsimapput.

- Unnerluuteqarnikkut neriuutigaara, Peter Grønvold Samuelseni unitsinneqassasoq, pissusilersuutigisartagaami killissamik qaangiineruvoq tamatumalu tarnikkut itisuumik ikilersimavaanga, arnap aappa politiinut unnerluutigisami assilineranik tigummiartoq Sermitsiaq.AG-mut oqaluttuarpoq

Arnap taassuma ilisimatitsissutigaa, arnat allat ajortumik pineqannginniassammata pisortaanerup qanoq unitsinneqarsinnaanera piffissami sivisuumi eqqarsaatigisarsimallugu.

- Aatsaat maannakkup angut pineqartoq politiinut unnerluutigissallugu saperunnaarpunga, arnaq pineqartoq Sermitsiaq.Ag-mut, ukiup ataatsip matuma siornatigut siullermik apersuisimasumut oqaluttuarpoq. Taamanikkut taanna politiinut unnerluutiginninnissamut sapiissuseqarsimanngilaq, tamannalu maanna Sermitsiaq.AG-p unnerluutiginninnerit pillugit oqaluttuarneranut tunngaviuvoq.

- Peter Grønvold Samuelsenip KNi-miikkunnaarnera nuannaarutigeqaraara. Ukiuni arlalinni aatsaat taamak pitsaatigisumik nutaarsiassarsivunga, arnaq taanna erseqqissaavoq.

Itisileerusunngitsoq

Siulersuisuni siulittaasoq Lars Borris Pedersen, Peter Grønvold Samuelsernip soraarniuteqarneranut suna tunngaviunersoq itisilerlugu oqaatigerusunngilaa.

- Sulisumut tunngassuteqarmat suliaq oqaaseqarfigeqqusaanngilara imaluunniit oqaaseqarfigisinnaanngilara, Lars Borris Pedersen ilisimatitsivoq.

Peter Grønvold Samuelsenip tiinganiartarsimasutut politiinut unnerluutigineqarsimaneranik ilisimasaqannginnerarpit?

- Naamik taamatut oqanngilanga. Soraarniuteqarnerli oqaaseqarfigerusunngilluinnarpara, Lars Borris Pedersen nassuiaavoq.

PwC-p misissuinera naammassineqarsimanngitsoq

2020-mi novembarip qaammataani sulisut arlallit Sermitsiaq.AG-mut oqaluttuarput, KNI A/S-imi uninngasuutit nalingannik naatsorsuusiornermi peqquserluuteqartoqarsimasoq. Pisup malitsigisaanik KNI-p siulersuisuisa politikkikkut tatineqaramik kukkunersiuisarfik PwC arlaannaannulluunniit attuumassuteqanngitsumik misissuitissimavaa.

PwC-p misissuinera naammassineqareerpa?

- Naamik suli naammassineqanngilaq, siulersuisuni siulittaasoq Lars Borris Pedersen erseqqissaavoq.

Sermitsiaq.AG-p Peter Grønvold Samuelsen mailikkut oqarasuaatikkullu oqaaseqartinniaraluarsimavaa, iluatsinnaguli.

KNI-mi oqarasuaatikkut tigooqqaasarfimmi sulisup Sermitsiaq.AG-mut ilisimatitsissutigaa, Perter Grønvold Samuelsenimut tunngatillugu saaffiginnissutit tamarmik siulersuisut siulittaasuannut ingerlatinneqartarnissaanik peqquneqarsimalluni. Peter Grønvold Samuelseni aamma Sisimiuni KNI-p qullersaqarfianiinngilaq. Ingerlatseqatigiiffiup attaveqartarnermut immikkoortortaqarfiata aamma Sermitsiaq.AG siulersuisut siulittaasuannut innersuuppaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER