KNI-mi pisortaaneq atorfimminit soraarniuteqarsimavoq
Kalaallit Nunaanni Namminersorlutik Oqartussat suliffeqarfiutaasa annersaanni, KNI A/S-imi, pisortaaneq Peter Grønvold Samuelsen suliffimminit soraarniuteqarsimasoq, tusagassiorfinnut nalunaaruteqarnermi ilisimatitsissutigineqarpoq.
Pisortaaneq Peter Grønvold Samuelsen KNI-mi atorfimminit martsip naanerani soraarnissani aalajangiussimavaa.
- Ukiut arfineq-pingasut angungajallugit KNI-miinnerma kingorna, suleqatikkalu aningaasaqarneq aalajaatsoq suliffeqarfik imminut akilersinnaasoq qulakkeersimavagut, isumaqarpungalu akisussaaffiup nukinnut nutaanut ingerlateqqinnissaa maannakkut piffissanngorsimasoq. KNI-mi qullersaaneq pissanganartuusimavoq kisianni aamma suliaavoq piumasartooq. KNI-miissimanera nuannarisimavara piumasaqaatillu tunniunneqartut ataanni angusarisimasagut tulluusimaarutigaakka. Ilikkagaqarsimaqaanga aamma aaqqissuussinerni suliffeqarfimmillu aqutsinermik misilittagaqalersimavunga, neriuppunga taakku ataqatigiinni allani atorsinnaassallugit. Ilaquttannut piffissaqarnerulissaanga nunatsinnilu pinngortitarsuaq tupinnartoq ilorrisimaarutigissavara, Peter Grønvold Samuelsen aalajangersimanini pillugu oqarpoq.
KNI-ip siulersuisuini siulittaasoq Lars Borris Pedersen tassunga atatillugu siulersuisut sinnerlugit imatut oqaaseqarpoq:
- Peter, ukiuni kingullerni arfineq-pingasuni KNI-mut sulissussisimanera pillugu annertuumik qutsavigerusupparput. Suliffeqarfik KNI, Peterp 2014-imi atorfininneranit pitsaanerusumik inissisimavoq. Maannakkut taartissaanik pissarsiorpugut, taassuma Kalaallit Nunaannut pisiniartartutsinnullu iluaqutaasumik KNI suli pitsaanerulersinniassavaa, Lars Borris Pedersen tusagassiorfinnut nalunaarut naapertorlugu taamatut oqarsimavoq.
Ilisimatitsissutigineqarpoq siulersuisuni siulittaasoq qulaani pineqartumut allanik oqaaseqaateqanngitsoq.
KNI-p Siulersuisui pisortaanermik nutaamik piaarnerpaamik pissarsinissaq siunertaralugu pissarsiorneq aallartissimavaat. Pisortaanermik nutaamik pissarsisoqarnissaanut, Jan H. Lynge-Pedersen KNI-mut ingerlatseqatigiiffiutigisaanullu pisortaanerugallarluni atorfeqassaaq.