KNI-mi nalunaaruteqartartoq: Aqutsisut qanigisatut ilaqutaasoq iluaqusertarpaat

Naatsorsuutitigut peqquserluttuliornerit, kannguttaatsuliornerit peqquserluuteqartarnerillu. Namminersorlutik Oqartussat ingerlatseqatigiiffiutaata KNI A/S-ip ilisarisimaneqarneranut ajoqusiisimaqaat, ajoqusiisimanerillu kukkunersiuisarfimmut PwC-mut suliaqartitsisimaqalutik.

Nalunaaruteqartartup unnerluussutaa alla PwC-mut saqqummiunneqarsimasoq, Sermitsiaq.AG-mit paasineqarpoq.

Inuup ataatsip suliffeqarfiutaa, KNI-mi qullersat ilaannut ilaqutaasumit pigineqartoq, 2013-imiit 2018-imi aasaanera tikillugu katillugit 7.566.403,46 koruuninik akissarsitinneqarsimasoq, nalunaaruteqartartup saaffiginnissuteqarnermini saqqummiussimavaa.

Inuk pineqartoq taamaalilluni ukiumut en million koruunit sinnerlugit isertitaqarsinnaasarsimavoq, tassa suliani nalunaaquttap akunneranut 1.000 koruunilersillugit akilersittarsimagamigit.

Siulersuisut siulittaasuata ataatsimeersuartoqarnissaa utaqqimaarusukkaa

Saaffiginnissummi inuk kinaanersoq taassumalu suliffeqarfiutaata taakuutaa, soorlu aamma ilaqutaasoq kinaanersoq saqqummiunneqarsimavoq. Taakku saniatigut akiligassaqarfiup normua akiliuteqarnermi atorneqartartoq ilisimatitsissutigineqarsimavoq.

Sermitsiaq.AG-mit siulersuisut siulittaasuat Lars Borris Pedersen aperineqarsimavoq, ilaqutaasup sullissineranut nalunaaquttap akunneranut 1.000 koruuninik KNI-p akiliuteqartarsimanera assuarnartuunnginnersoq, sullissisarsimasoq atorfinitsillugu imaluunniit inummik allamut taamatulli piginnaasalimmik atorfinitsitsinikkut suliassat akikinneerarsuarmik isumagineqarsinnaagaluarmata.

Lars Borris Pedersenili Sermitsiaq.AG-mut akissuteqarusussimanngilaq, innersuussutigaali tallimanngornermi ataatsimeersuartoqarnissaa utaqqimaarniarlugu, tamatumalu kingornatigut apeqqutigineqartut tamaasa sapinngisamik akissuteqarfiginiarniarlugit.