KNI-mi mamianartuliaq: Taamaattumik saqqummerpunga
KNI-mi naatsorsuutitigut peqquserluttuliornermut peqataaneq inummut namminermut akisusimaqaaq. Ilaatigut tamanna patsisigalugu KNI A/S-imi naatsorsuutitigut peqquserluttuliornermut qitiusumik inissisimasoq, Sermitsiami apersorneqarluni maanna saqqummerpoq. Tamatumani neriuutigigamiuk pineqartoq tamakkiisumik qulaajarneqassasoq akisussaasutullu inissisimasut akisussaatinneqarnissaat.
- Tarrarsuummi imminut isigisinnaaneq pineqarpoq.
Taama pisariunngitsigisumik oqaasertalerneqarpoq.
Taama oqartoq tassaavoq Hans-Peter Lynge-Larsen KNI A/S-imi naatsorsuutitigut peqquserluttuliornerit pillugit unnerluutiginninnermi maannamut kinaassutsiminik isertuussisimasoq. Tassa KNI-mi siornatigut suleqatigisimasai Dorthea Olsen Rasmussen aamma Ane Marie Schmidt Hansen atuartartutut Sermitsiami sapaatip akunnerani kingullermi saqqummiussereersullu.
Hans-Peter Lynge-Larsenip inuunermini suliarisimasaasa allattorsimaffianni allassimavoq, inuunini tamaat kisitsisinik naatsorsuutinut tunngasunik suliaqartarsimasoq (paasisat takukkit, aaqq.) suliffeqarfimmilu Namminersorlutik Oqartussanit pigineqartumi ukiut 20-t sinneqartut sulisimalluni.
Suleriaaseq nutaaq
Piffissaq 2014-imut utertikkaanni, taamani Peter Grønvold Samuelsen KNI A/S-imi pisortaanertut toqqarneqarpoq. Piffissamilu tamatumani qullersat aalajangiuppaat, Pilersuisumi quersuarniittuutigineqartut qanoq naleqartiginerisa naatsorsorneqarnerini nutaamik suleriaaseqartoqalissasoq.
Naatsumik oqaatigalugu naatsorsuuserinermut immikkoortortaqarfik IT-mut programimik immikkut ilusilersukkamik pissarsivoq, tamatumuuna ajornarunnaarluni aningaasartuutit katinnerisa amerlisissinnaanerat ikilisissinnaanerallu aamma nioqqutissat normuisa tusindilikkaat amerlassusaat allanngortinneqarsinnaallutik. Quersuarni uninngasuutinut qarasaasiami programmi atorneqartoq ima nutaaliaalluinnartigivoq, peqquserluttoqarnera kukkunersiuisunit paasineqanngisaannarluni, qarasaasiamilu allatugaatigineqartut pigineqartut nioqqutissat normuinik eqqortunik allattuiffiusimasut aserorterneqarlutik.
Hans-Peter Lynge-Larsenip IT-mi naatsorsuutinut programmip nutaap immersorneqarnissaa 2014-imi suliassarilerpaa, kisitsisit taamaalillutik naammaginartumik qullersarisaannut ukununnga isikkoqarniassammata: naatsorsuuserinermi qullersamut, aningaasaqarnermut pisortamut aamma pisortaanermut.
Kisianni taamani annerusumik eqqarsaatiginngisaa tassaavoq ilerasunneq, ukiut ingerlaneranni arriitsumik alliartuinnartussaq. KNI-mit 2015-imi atorfeqarunnaarpoq Nuummullu nuulluni, siunnersortitulli 2018-ip tungaanut attaveqaannarluni, qullersammi quersuarniittunik qanoq naatsorsuinissamut ilisimasai pinngitsoorsinnaannginnamikkit.
Hans-Peter Lynge-Larsen Kommuneqarfik Sermersuumi naatsorsuuserinermi ullumikkut qullersaavoq, tassungalu ajornannginnerpaaq tassaassalluni KNI-mi atorfeqarsimanerminut tunngasunik nipangiussilluinnarnissaa.
Naaggali.
Inuussutissarsiornikkut mamianartuliaq
Tamatumunnga taarsiullugu unnerluutiginnilluni saqqummerpoq, taannalu tassaalersinnaalluni Nunatta oqaluttuarisaanerani inuussutissarsiornikkut mamianartuliat annersaasa ilaattut oqaatigineqartoq.
Sooruna saqqummerlutit oqaluttuartutit?
– Naatsorsuutitigut peqquserluttuliornernut peqataasimasutut ilisimasaqarneq assorsuaq artorsaataasimavoq. Tamanna eqqarsartaatsimut timimullu nungullarsaataasimaqaaq. Siulersuisut siulittaasuat Lars Borris Pedersen tusagassiuutinut nalunaaruteqarluni oqaatigimmagu tamanna naatsorsuuserinikkut kukkunerusimasoq, 2010-mi pilersimasoq, taava kamaammernartaqigami, Hans Peter Lynge-Larsen oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: