KNI-mi mamianartuliaq pissutigalugu Múte iliuuseqartoq
Naalakkersuisut Siulittaasuata Múte B Egedep namminersorlutik oqartussat suliffeqarfiutaani kukkunersiuisarneq pitsanngorsarusuppaa. Pisortat suliffeqarfiutaat marlunnik kukkunersiuisoqartarnissaat pilersaarutaavoq.
- KNI-mi mamianartuliaq ajorluinnartumik annertussuseqarsimavoq, taamatullu pisoqaqqinnginnissaa pillugu suliniut nutaaq aallartittoq tamassuminnga nassuiaateqarpoq aamma, Múte B. Egede Sermitsiaq.AG-mut nassuiaavoq.
Sillimmartaartoqarnissaa pisariaqartutut isikkoqarsoraa, suliffeqarfiilli kukkunersiuisui apeqqusertariaqannginnerarlugit.
- Ullumikkut peqqutissaqanngilagut arlaannaalluunniit pikkorlulluni sulisutut pasillissallugu, piginnittulli - tassa nunatsinni innuttaasut - sinnerlugit pisortat suliffeqarfiutaanni naatsorsuutit equngasoqaqqunagut qulakkeerinninnissamut iliuuseqartariaqarpugut, Múte B. Egede oqarpoq.
Taassuma erseqqissarpaa suliniutip qulakkiissagaa suliffeqarfiit politikkikkut sulinermi attuumassuteqarfigineqannginnissaat.
Iliuusissatut takorluugaq Royal Arctic Linemit atorneqareerpoq. Royal Arctic Line kingullermik ataatsimeersuarami kukkunersiuisut Deloitte kukkunersiuisunik marlunnik, PricewaterhouseCoopers aamma Grønlands Revisionskontorimik taarserpai.
KNI-p quersuaani nalitigut allanngortiterisoqarsimanera Deloittep paasinngitsoorsimavaa. Tamassuma kinguneranik suliffeqarfiup aningaasatai tigoriaannaasut 60 milliuunit koruuninik ikilisinneqartariaqalersimapput. Taassuma saniatigut 2014/15-imi aningaasanik nuussuisimanerit aamma suliffeqarfiup 52 milliuunit koruuninik annaasaqaatigai. Suliat pingajuat, tassa suliffeqarfiit iluini aningaasanik tunngavissaqanngitsumik nuussisarsimanerit. Tassani Neqi A/S 7 milliuunit koruuninik tigoriaannarnik aningaasaateqaraluarsinnarluni, aningaasat tigoriaannaat 30 milliuunit koruuninik amigartoorfiulerput.
KNI 8. oktober ataatsimeersuarami Deloitte PricewaterhouseCoopersimik taarserpaa. Kukkunersiuisut taakku kinaassutsimik isertuussilluni nalunaaruteqartut tunngavigalugit KNI-mi misissuisimavoq.
- KNI-mi pisimasut tamatta ilinniarfigisariaqarpagut. Kukkunersiuisartut marluusarnissaannik suliniutiga tamassuminnga tunngaveqarpoq. Suliffeqarfiutitsinni pissutsit ajunngitsumik ingerlanissaat tatigilluinnartariaqarparput, tassanilu kukkunersiuisartut pingaaruteqarluinnarput, Múte B. Egede oqarpoq.
Læs hele sagen:
-
KNI har rod i regnskaberne
-
KNI fejer regnskabsfusk ind under gulvtæppet
-
Pustes et lager op påvirker det overskuddet
-
Uvildig undersøgelse af KNI-sag
-
Tilliden skal genoprettes
-
Tatiginninneq pilerseqqinneqassaaq
-
Sådan blev KNI-regnskab manipuleret
-
KNI-bestyrelse vil afvente politiets efterforskning
-
KNI-mi siulersuisut politiit paasiniaanerat utaqqeqqaarniarpaat
-
KNI ramt af corona-restriktioner